Setor Privadu Koopera Ho Governu Buka Solusaun Pagamentu Sesta Bazika

DILI, STLNEWS.co – Setor privadu ho governu koopera ona hodi buka solusaun ba pagamentu programa sesta bazika, tanba nee foin dadauk iha semana kotuk governu halo tan pagamentu ba kompania 7 ou 8, no sira neebe seidauk hetan pagamentu tanba sei trata hela dokumentu.

Kestaun nee fo sai husi Prezidente Camara Comersiu Industria Timor Leste (CCI-TL), Oscar Lima ba STL iha nia knaar fatin Comoro, Domingu (28/03/2021).

“Pagamentu ba programa sesta bazika, ami koalia ona ho ministeriu relevante neebe responsablidade ba asuntu programa sesta bazika no iha ona solusaun, tan nee governu hahu halo ona pagamentu ba kompania importador sira. Iha semana kotuk governu halo tan pagamentu ba kompania 7 ou 8, pagamentu ba kompania sira nee governu halo lor-loron bazeia ba dokumentu pagamentu nian,” dehan Oscar Lima.

Nia mos afirma liu tan katak, governu selu tarde tanba sistema maibe fiar katak iha semana ida nee nia laran, governu bele selu hotu, tanba governu halo hela esforsu oinsa atu pagamentu lalais.

“Ami koalia ona ho ministeriu relevante atu solusita pagamentu ba kompania distributor sira, tanba kompania balun nia kapital 50% deit, depois nia prorgama lao too deit 50% nia kapital laiha ona, tan nee nia tenke ba deve iha banku, tan nee pagamentu tarde mak osan oan sira nee tenke selu hotu ba banku depois ho nia jurus, tan ami koalia ona ho governu atu rrezolve lalais. Fiar katak, semana ida nee bele selu hotu ona,” dehan Prezidente CCI-TL.

Iha parte seluk, Leonizia Ximenes, hanesan kompania distributor ba programa sesta bazika hatutan, hanesan kompania neebe governu fo fiar hodi distribui programa sesta baziku ba venefisiariu sira, dokumentus hanesan resivu no dokumentus seluk neebe governu presiza nee, hatama hotu ona, tanba nee hein deit pagamentu.

“Ami nia maluk kompania distributor programa sesta bazika nee, balun hetan ona pagentu husi governu, maibe balun seidauk hetan tanba governu sei trata hela dokumentus, tan nee ami setor privadu prontu atu koopera ho governu hodi hein pagamentu, tan nee sedu ou tarde governu sei selu,” dehan kompania distributor nee.

Nia mos afirma liu tan katak, agora Timor Leste iha hela serka sanitaria ba surtu Covid-19, tanba nee fo espasu ba governu hodi hare dokumentus sira nee ho diak, hafoin halo pagamentu maibe tuir informasaun husi maluk kompania balun katak, governu hahu halo pagamentu.

Nunee mos too notisia nee hatun, STL seidauk hetan konfirmasaun husi governu, liu liu ministeriu neebe responsavel ba programa sesta bazika.*

Reportajen: Madalena Horta
Editor: Crisogono Magalhães

LEAVE A REPLY

Please enter your comment!
Please enter your name here