Sidadaun Fernando Apoiu Fos Saka 90 Ba Estudante Viqueque

Sidadaun Fernando Amaral husi Munisipiu Viqueque, Posto Administrativu Uatulari, Suku Afaloicai ho inisiativa rasik sosa fos saka 90 hodi apoiu ba estudante husi Viqueque neebe mak hela iha kapital Dili, dok husi inan aman durante tempu serka sanitaria nee. (Foto: STL/Emerenciana Pinto)

DILI, STLNEWS.co – Sidadaun Fernando Amaral husi Munisipiu Viqueque, Posto Administrativu Uatulari, Suku Afaloicai ho inisiativa rasik sosa fos saka 90 hodi apoiu ba estudante husi Viqueque neebe mak hela iha kapital Dili, dok husi inan aman durante tempu serka sanitaria nee.

Fernando hatete, oras nee ho implementasaun serka sanitaria, dalan husi munisipiu mai sidade Dili taka no husi kapital ba munisipiu mos taka. Ida nee fo impaktu boot ba estudante neebe mak hela iha Dili, tanba nee nia iha inisiativa hodi sosa fos naton hodi fahe netik ba estudante sira hodi tahan netik ba loron balun nia.

“Ida nee inisiativa rasik, tanba haree ba realidade neebe mak iha, oras nee governu implementa hela serka sanitaria hodi taka dalan husi munisipiu mai iha kapital Dili, entau susar ba estudante sira neebe mak hela iha Dili, laiha hahan tanba dok husi familia.

Entau hau ho hau nia feen iha inisiativa rasik hodi hola fos, para bele fahe netik ba estudante sira neebe oras nee hakilar, tanba hamlaha liu liu estudante Viqueque oan sira,” haktuir nia ba STL iha nia knaar Surikmas, Kuarta (17/03/2021).

Nia hatete, foos neebe mak hola hodi nia osan rasik mak hola hamutuk fos saka 80 no hetan mos apoiu fos saka 8 husi maun segundu Amaro no saka rua husi mos maun ida husi Viqueque Villa.

Nunee mos sstudante Lourdes Trindade ho laran haksolok hatoo agradese ba sidadaun Fernando neebe mak ho inisiativa nakonu ho fuan domin, hodi bele fahe netik fos ba sira iha tempu neebe mak defisil nee, tanba oras nee sira sente triste, labele hetan hahan husi inan aman tanba dalan taka.

“Iha oportunidade ida nee dala ida tan ami hatoo agradese ba maun Fernando neebe mak ajuda ami Viqueque oan iha tempu defisil nia laran nee, no ami haree maun ajuda ami fo fuan no laran duni tanba nee mak hau lori kolega estudante sira nia naran hatoo obrigada barak,” katak nia.

Tuir observasaun neebe mak STL hetan antes atu fahe fos ba estudante sira, sidadaun nee mos fahe informasaun liu husi ninia facebook hodi fo avizu ba estudante sira katak, estudante neebe mak hela iha Dili, sekarik iha defikuldade bele hakat direita iha nia fatin Surikmas, nunee bele hetan netik fos oituan oituan hodi han ba loron balun nia laran, hodi hein apoiu husi governu.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here