Stok Fos Menus

Stok fos iha armajen kompania importador sira nian hahu menus, tanba nee fo impaktu ba folin fos iha merkadu hahu sae. (Foto: Espesial)

DILI, STLNEWS.co – Stok fos iha armajen kompania importador sira nian hahu menus, tanba nee fo impaktu ba folin fos iha merkadu hahu sae.

Tuir kompania Distributor, Fernado Araujo katak, stok fos iha loja hahu menus tanba iha armajen kompania importador sira nian, hanesan Lisun, Perisos nomos armajen Bebonuk hahu menus, balun stok laiha ona, tanba nee fo impaktu ba presu fos hahu sae iha merkadu, tantu nasional nomos munisipiu.

”Durante loron hirak nia laran kompania distributor barak mak mai antrian iha armajen atu sosa fos hodi lori ba faan iha Munisipiu sira, maibe stok iha armajen laiha, balun iha maibe hela uituan deit, tanba nee fo impaktu ba folin fos sae iha merkadu, 20 kg ho folin 11 dolar no 25 kg sae ona ba 13 dolar, balun 13 dolar 50 cent tanba sosa iha kompania importador folin hahu mudansa,” dehan Fernando Araujo ba Jornalista, iha Comoro, Kuarta (10/03/2021).

Nia katak, kompania distributor fos husi Munisipiu hotu-hotu kuaze mai hasai fos iha Dili, ka kompania importador sira, maibe agora ho serka sanitaria, movimentu hotu la lao, ida nee bele fo impaktu ba folin aihan sae iha merkadu. No aat liu tan folin sei sae makas iha munisipiu, tanba stok iha armajen kompania importador sira nian nian balun hotu.

Hatan ba kestaun nee Ministru Asuntu Parlamentar e Ministru Komunikasaun Sosial (MAPKOM), Francisco Jeronimo hateten, governu seidauk hatene lolos fos iha loja sira nee mamuk hotu ona, maibe tuir informasaun husi Centru Logistik Nasional (CLN) katak, fos neebe governu prepara nee sufisiente atu halo intervensaun ba iha merkadu.

“Hau hanoin fos neebe maka ita nia empreza sira hatama mai nee mos sei iha, maibe dala ruma kompania sira bele aproveita situasaun tanba bisnis, tanba nee husu ba povu atu labele paniku fos iha armajen governu sei sufisiente atu halo intervensaun ba iha merkadu,” dehan Francisco
Jeronimo.*

Reportajen: Madalena Horta
Editor: Ekipa STL

LEAVE A REPLY

Please enter your comment!
Please enter your name here