DILI, STLNEWS.co – Reprezentante povu iha uma fukun Parlamentu Nasional (PN) husu subsidiu kombustivel ba transporte sira nee tenki too iha munisipiu hotu.
Tuir Deputada Bankda FRETILIN, Lidia Norberta agradese ba governu neebe konsege halo lei no lori ba Prezidente Republika promulga ona, konaba hatun folin kombustivel liu husi subsidiu, maibe sujere ba governu atu asegura ho nunee subsidiu nee bele too ba benefisiariu transporte publiku sira, no mos motor sira neebe halo ojek iha foho.
“Ami husu ba governu atu asegura didiak, ho nunee subsidiu sira nee bele too ba iha benefisiariu sira hotu, ka transporte publiku sira bele hetan hotu, no mos motorista sira neebe halo ojek iha munisipiu sira nee tenki akomoda hotu ema sira nee nia nesesidade, no mos pasajeirus sira neebe uza roo hodi halo viajen ba mai Dili-Atauro no Dili-Oecusse,” dehan nia.
Deputada nee mos hatoo agradese ba governu neebe iha ona hanoin diak atu fo subsidiu nee ba transporte sira, maibe husu atu kontrola didiak ho nunee apoiu sira nee bele ba too duni povu sira.
Iha fatin hanesanm Deputadu Mariano Assanami Sabino hateten, politika governu nian nee diak, maibe tenki kontrola didiak iha baze, ho nunee apoiu sira nee bele too duni ba iha benefisiariu sira.
“Ita haree problema sira neebe uluk lao ona, hanesan sesta bazika, sasan sira neebe distribui ba povu sira nee la too folin neebe determina, dala ruma ita fo lukru liu ba kompania sira, no povu hetan deit rohan oan, tanba nee atu fo subsidiu konbustivel ba transporte sira nee tenki kontrola didiak,” dehan deputadu nee.
(mad)
