DILI, STLNEWS.co – Komunidade Suku Zulo, Postu Administrativu Zumalai, Munisipiu Kovalima, iha loron Sesta (05/08/2022) hahu simu ona sesta bazika.
Kestaun nee haktuir husi Xefi Suku Zulo, Postu Administrativu Zumalai, Joao Lopes de Carvalho, liu husi telefone, Sabadu nee (06/08/2022 ).
“Depende ba kompanhia, Suku Zulo hahu Sesta horiseik, ohin, bele mos too aban Domingu, komunidade husi Suku Zulo hamutuk 653 KK, kompostu husi aldeia 4, mak hanesan zulo tas, obuk mil, leogol no lale, komunidade simu sesta bazika nee, naan ema ida kilo rua, depende ba iha visa familia nee ema nain hira,” dehan Joao.
Joao dehan, Kompanhia Aitula mak distribui sesta bazika ba komunidade Suku Zulo, komunidade sira simu foos, mina, kafe, masi midar, forai no seluk tan, tanba nee Suku Zulo bele simu too aban mak remata.
Nunee mos Justina Cardoso hanesan komunidade Suku Zulo, Aldeia Lale hatete, tuir lo-loos ohin sira simu ona sesta bazika, maibe Aldeia Zulo atas no Aldeia Obuk Mil mak sei simu uluk, tanba nee sira sei hein ba loron Segunda.
“Ohin ami hein, maibe seidauk simu, tanba aldeia ida ou rua mak sei simu uluk, ami hein ba loron Segunda mak sei simu sesta bazika,” dehan Justina.
(jac)
