Swab Obrigatoriu Laprevene Covid-19, Assanami: Diak Liu Izola Sidadaun Apoiu Hahan-Osan

DILI, STLNEWS.co – Governu hasai medidas teste swab obrigatoriu ba populasaun hotu, maibe sei lahakotu transmisaun Covid-19 iha rai laran. Tuir los izola komunidade hotu, fo apoiu kada sidadaun $100 no mos hahan, nunee bele rekopera.

Deputadu bankada PD, Mariano Assanami Sasbino hatete, agora halo swab obrigatoriu nee, pozisaun PD durante nee apoiu governu ho razaun povu sofre tanba Covid-19, krize ekonomia, neebe PD hakarak hakotu impase ho governu, hodi hasoru dezafiu lao ba oin, nunee mos hakarak hamutuk rekopera ekonomia.

Tanba nee mak PD sempre vota afavor ba rezolusaun hotu neebe liga ba EE, konfinamentu, no medidas saida deit ba hasoru Covid-19. Tanba nee PD halo proposta atu apoiu kada ema ida hetan $100, no mos ba estudante sira fo $200. Nunee mos PD sempre apoiu mos orsamentu ba rekoperasaun ekonomia atu tau osan iha BNCTL fo kreditu.

“PD hanoin katak proposta neebe lojika liu atu hakotu Covid-19, tanba nee iha debate orsamentu retifikativu proposta katak kada ema ida dolar atus ida ($100), hahu husi bebe ba too ferik katuas. Osan nee fo para atu izola ema hotu-hotu iha uma laran, ita mobiliza polisia, FDTL, mediku, inklui sira neebe iha lina frente hodi fo atendimentu ba apoiu sira, no atende Covid-19 hodi hakotu transmisaun. Iha proposta atu fo apoiu osan dolar atus rua ($200) ba estudante, hodi sira labele sai, hakmatek iha fatin, se ida nee implementa, loron 20 deit hotu-hotu sulan iha uma, transmisaun nee hakotu ona, maibe governu laaseita”, katak Assanami ba jornalista, iha PN, Dili, Kinta (06/05/2021).

Nia afirma, proposta PD nian neebe momentu hatama iha debate OR nee governu laaseita, i husik hela deit, nunee estende tan fali Estadu Emerjensia (EE) ba dala 13, ida nee afeta ba povu hamlaha, halao atividade, nunee bandu tan atu povu labele sai.

“Medidas nee los, povu labele maibe se mak fo han ba sira, se mak fo osan ba sira. PD husu atu atu fahe osan nee, tanba osan nee laos governu nia, maibe osan nee povu nian, neebe merese atu ema hotu hetan para mantein lai nia saude,” kestiona Assanami.

Tuir nia, dezenvolvimentu nee konsentra ba ema, osan nee direitu povu nian, ukun povu neebe povu entrega ukun, atu hodi jere povu nia osan ida nee mak konseitu demokratiku ba ukun nian. Neebe PD nia hanoin katak labele halo sasan sira obrigatoriu maibe lafo kondisaun, i lafo apoiu.

Nunee mos, Deputadu PLP Noe da Silva hatete, haree ba swab obrigatoiru nee, husi PN liu-liu husi komisaun trata asuntu saude fo apoiu, tanba ida nee inisiativa diak hodi bele obriga sidadaun sira bele tuir, se lae dehan voluntariamente sidadaun nian mak ba swab, ida nee hanesan halimar demais ho situasaun.

“Estadu iha dever moral atu bele proteje nia sidadaun sira liu husi lei no autoridade neebe mak iha. Neebe haree ba swab obrigatoriu nee diak, tanba ema Timor nee kakutak nee defisil atu simu buat neebe diak, tanba nee husu ba sidadaun hotu atu bele koopera.” katak Noe.

Enkuantu haree ba swab obrigatoriu dehan viola direitu umanus nee, depende ba ida-idak nia interpretasaun, se lei nee dehan viola ema nia direitu, ida nee lae karik neebe depende ba situasaun iha terrenu, labele jeneraliza katak buat hotu ladiak.*

Reportajen: Guilhermina Franco/Domingas Soares
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Harii Federasaun Tenke Prepara Kondisaun

DILI, STLNEWS.co - Sekretariu Estadu Juventude No Desportu (SEJD), hatete harii federasaun tenke prepara mos kondisaun hanesan tenke iha atleta no treinador rasik. Lia hirak...

SEJD Enkontru Ho Lider Artemarsiais

DILI, STLNEWS.co - Sekretariu Estadu Juventude no Desportu (SEJD), halao enkontru ho lider artemarsiais sira iha Timor Leste, kona ba rekezitus artemarsiais nian neebe...

Lori Maromak Nia Domin Ba Ema Hotu

DILI, STLNEWS.co - Nuudar sarani neebe diak iha moris, tenke sai valeta ba ema hotu, atu lori Maromak nia grasa no domin ba maun...
%d bloggers like this: