DILI, STLNEWS.co – Tane Konsumidor daudaun nee halo observa ba folin mina, ba transporte sira kompara fulan Marsu no fulan Abril folin sae makaas kuaze 15% too 21%.
Liu husi informasaun neebe STL asesu husi Prezidente Tane Konsumidor, Antonio Ramos iha Sabadu (16/04/2022) nee hatete, iha loron 07 fulan Abril tinan nee, Tane Konsumidor foti tan dadus fulan Abril nian hodi kompara dadus fulan Marsu nian nota katak, inflasaun folin mina nian sae makaas kuaze aumenta entre 15% ba 21 %.
“Tuir tabela neebe prepara ona iha tendensia gazoel mak sae makaas kompara ho gazolina,” dehan Antonio Ramos.
Iha biban nee, Tane Konsumidor renova tan, husu nafatin intervensaun estadu iha situasaun krizi nian hodi fo subsidiu seletivu kombustiveis ba transporte publiku sira (taxi, mikrolet no bis), no mos ba trator ba agrikultor sira no peskador sira.
“Tane Konsumidor liu husi ninia Presidente Diresaun agradese, tanba governu bele rona intervensaun Tane Konsumidor nian liu husi rekolha dadus konaba inflasaun iha fulan rua tuir-tuir malu, loron 14 fulan Marsu tinan 2022 no iha loron 07 fulan Abril tinan 2022 hodi fo subsidiu ba transporte rodaviaria,” katak nia.
(san)
