Tauk Hamlaha, Mateus Hakarak Fila Munisipiu

(Foto: STL/Alberto)

DILI, STLNEWS.co – Sidadaun Bobonaro ho naran kompletu Mateus Ximenes hateten, governu estende tan serka sanitaria no konfinamentu domisiliariu ba munisipiu Dili nee defikulta sira atu halo atividade negosiu hodi hetan osan para sustenta sira nia moris, tanba nee deside hakarak fila fali ba munisipiu.

Tuir nia, governu deside implementa serka sanitaria no konfinamentu domisiliariu iha Munisipiu Dili, laos atu salva populasaun sira husi moras Covid-19 maibe hakarak oho sidadaun sira, tanba sei mate tanba hamlaha.

“Governu nee hakarak oho deit nia povu, tanba uza falun EE no SS ba sira nia diak, ami iha Dili baruk ona tanba governu uza serka sanitaria hamate ami, tanba ami la tauk mate ba corona maibe tauk ba hamlaha. Tanba nee mak ami deside tenke sai husi Dili ba hela iha ami nia rai ba para han aihan sira iha toos laran neeba. Laos mai kastigu ami pois la tau matan,” informa Mateus Ximenes iha Tasi-Tolu, Sesta nee (02/04/2021).

Nia dehan, senti triste durante governu implementa serka sanitaria iha Dili, atividade sira paradu hotu, nunee bele halo ema mate tanba hamlaha.

“Agora ami la iha servisu ho situasaun hanesan nafatin iha Díli atu han saida, ami kost tan familia barak, oinsa ami nia hahan lor-loron, nee ami bele mate atu han saida,” tenik Mateus.

Tanba nee nia husu ba governu atu loke dalan ba komunidade neebe mak hakarak fila fali ba ida-idak nia munispiu. Se wainhira la loke dalan tenke apoiu ona nesesidade bazika ho emerjensia no labele hein tan, tanba povu agora hahu hasoru problema hamlaha.

Enkuantu tuir observasaun STL dalan husi parte rai klaran Aileu, Ainaro, Manufahi no Covalima dalan taka iha Manleuana. Husi parte Oeste, ba munisipiu Liquiçã, Ermera no Bobonaru dalan kontinua taka iha pontu entrada Tasi-Tolu. Antes neee governu liu husi reuniaun Konsellu Ministru aprova ona rezolusaun governu deside hodi kontinua estende tan serka sanitaria (SS) no konfinamentu domisiliariu iha Dilii too 17 Abril tinan nee hodi bandu komunidade labele sai husi Dili.*

Reportajen: Alberto Menezes
Editora: Domingas Gomes

LEAVE A REPLY

Please enter your comment!
Please enter your name here