Taur: 2020 TL Hasoru Dezafiu Barak

Primeiru Ministru (PM) Taur Matan Ruak. (Foto: Gabinete Primeiru Ministru)

DILI,STLNEWS.co – Primeiru Ministru (PM), Taur Matan Ruak hatete tinan 2020 hanesan tinan neebe governu Timor Leste hasoru dezafiu barak, hafoin restaura nia indepedensia iha tinan 2002.

Xefe governu hatutan, tinan 2020 hanesan tinan ida neebe hamosu dezafiu barak liu, neebe Timor Leste hasoru hahu  dezde loron dahuluk  ukun aan, tanba Timor Leste  hetan ezame husi tempestade dezastroza, husi akontesimentu neebe nunka hanoin hetan atu mosu.

“Ita hasoru pandemia Covid-19, inundasaun no impase polítiku neebe naruk, neebe tau ita nia demokrasia iha prova. Tempu neebe uniku no nakonu ho dezafiu sira nee hatudu ita nia nasaun nia forsa no nia susesu atu hamutuk nuudar isin lolon ida deit, hanesan governu unidu ida neebe serbi ninia povu no kapasidade sosial ita nia povu nian ba reziliensia no adaptasaun ba xoke sira,” dehan Primeiru Ministru (PM), Taur Matan Ruak liu husi deklarasaun iha debate jeneralidade OJE 2021, iha Parlamentu Nasional, Dili, Segunda,(30/11/2020).

Nasaun nee tuir xefe governu katak, hasoru Covid-19 ho forma desiziva no efikas. Maibe Timor Leste mobiliza ona tokon US$220 resin, neebe inklui tokon US$92 ba medida imediata sira ba resposta ekonomika. Ho planeamentu no rapides neebe antes nee nunka akontese.

“Ita dezenvolve unidade atendimentu emerjensia nian, Ita harii sistema kuarentena, teste, no rastreiu no lokalizasaun nian ida. Ho forma signifikativa ita haforsa ita nia sistema saude no apoiu ba profisional saude no funsionariu sira neebe serbisu iha lina oin,” dehan xefe governu

Nia dehan, governu no Parlamentu Nasional ho barani foti desizaun, iha tempu neebe badak hodi proteje fronteira sira, Timoroan sira uza maskara, fase liman no mantein distansiamentu sosial.

Durante estadu emerjensia Lei no regulamentu hamutuk 18 maka Governu aprova ona hodi garante resposta oportuna ida ba Covid-19, Iha loron balun hafoin kriasaun estadu emerjensia, subsidiu eletrisidade nian governu implementa daudaun no bee moos fornese ho gratuita.

“Ita prienxe fila fali ita nia abastesimentu ai han emerjensia nian, mantein ita nia konetividade internasional liu husi Darwin hodi mantein movimentu abastesimentu no espesialista sira nian. Uma kain besik 300.000 maka simu transferensia osan dolar $200 ho karakter universal. Ita selu ona subsidiu salarial sira, tulun ita nia estudante sira neebe maka hela iha rai liur no ita estimula produsaun agrikola,” tenik nia.

Nia dehan, Timor Leste nia medida estabilizasaun proteje ona família sira husi lakon sira nia rendimentu, monu ba kiak, no dezempregu no ajuda ona empreza sira hodi sustenta ninia fluksu kaixa no mantein traballador sira serbisu nafatin. Aleinde resposta imediata nee, iha loron 12 fulan agostu, governu aprova ona pakote rekuperasaun ekonomika nian ida. Pakote nee hatuur medida ba prazu badak no prazu mediu nian hamutuk 71 neebe sei implementa entre tinan 2021 too 2023.*

Reportajen: Alberto Menezes

Editor: Ekipa STL

LEAVE A REPLY

Please enter your comment!
Please enter your name here