Tempu Badak Governu Lori Orsamentu Ba PN

Primeira Vice Parlamentar Nasional, atual Deputada bankada PLP Maria Angelina Sarmento. (Foto: Espesial)

DILI, STLNEWS.co – Tempu badak governu sei lori orsamentu retifikativu tinan 2021 nian ba Parlamentu Nasional (PN), atu aprova hodi responde ba situasaun Covid-19 neebe Timor Leste hasoru.

Kestaun nee informa husi Primeira Vice Parlamentar Nasional, atual Deputada bankada PLP Maria Angelina Sarmento ba jornalista iha PN, Sesta (26/03/2021).

Nia katak, desizaun neebe iha reuniaun Konsellu Ministru deside atu toma lalais desizaun urjentemente ba situasaun sira neebe mak efeitu husi serka sanitaria, iha medidas lubuk ida mak iha, i medidas sira nee hanesan ho medidas uluk governu foti iha inisiu estadu emerjensia fulan Marsu ho Abril tinan kotuk.

“PN simu ona informasaun katak tempu besik governu sei lori fali proposta orsamentu retifikativu tinan 2021 nian, mai iha PN atu aprova hodi responde ba medidas sira neebe iha ona. Neebe hau fiar katak osan neebe aprova ba iha tinan 2021 iha programa balu neebe ladun prioridade atu ezekuta, tanba haree ba dinamika covid neebe mak agora dadaun akontese. Sa tan ho serka sanitaria nee governu mos labele halo movimentu barak hanesan iha situasaun normal,” nia tenik.

Nia hatutan, agora foin tama iha periodu primeiru trimestre nian, hanesan Janeiru mai too Marsu, neebe sira rona katak iha Abril nee governu hakarak lori ona orsamentu retifikativu mai PN. I informasaun neebe iha katak sei laiha aumentu ba tetu orsamentu 2021 nian, maibe altera deit husi programa neebe governu haree seidauk bele atu ezekuta. Ezemplu ba projetu infraestrutura, grande projetu sira nee seidauk realiza, karik bele hanoin atu aloka fila fali osan sira nee ba ministeriu neebe mais relevante atu hodi responde ba medidas neebe governu propoin ona iha reuniaun Konsellu Ministru.*

Reportajen: Guilhermina Franco/Domingas Soares
Editor: Ekipa STL

LEAVE A REPLY

Please enter your comment!
Please enter your name here