DILI, STLNEWS.co – Tempu kalan bazar iha Rotunda Elemloi neebe mak partense ba iha Suku Manleuana kontinua rame, tanba komunidade barak mak faan iha tempu kalan kompara ho loron.
Tuir observasaun neebe mak STL nota iha Kuarta horiseik (08/09/2021), maske kalan maibe iha fatin refere rame, tanba vendedor barak mak uza fatin nee hodi faan sasan, no kompradores sira mos barak mak ba hola sasan iha fatin refere.
Maske laiha baraka ruma hodi vendedor sira uza tau sira nia sasan, maibe sira uza estrada ibun hodi tau meza oan hodi rai sasan neebe mak sira faan, balun nahe plastiku iha rai mak hodi faan no balun uza gerobak mak faan iha laran.
Sasan neebe mak komunidade sira faan mak modo tahan, balun faan ikan no ai-funan. Aleinde nee loja neebe mak iha Elemloi mos tempu kalan kontinua loke hodi fo atendimentu ba komunidade sira neebe hola sasan iha tempu kalan.
Tuir observasaun diariu nee laos Elemloi deit, maibe iha area Bairo Pite mos hanesan, tempu kalan rame tanba vendedor sira hodi sasan mai faan iha tempu kalan no komprador sira mos barak sosa.
Nunee mos iha parte tasi ibun Pantai Kelapa iha tempu lokraik rame, tanba iha tasi ibun vendedor faan ikan no katupa hodi atrai ema barak ba han no sente tasi nia fresku iha tempu lokraik.*
Reportajen: Emerenciana Pinto
Editor: Ekipa STL
