DILI, STLNEWS.co – Kompanhia rai laran ka rai liur neebe halo atividade negosiu iha merkadu Timor Leste, atu labele manipula presu sasan, mak governu tenki estabelese lei krimi ekonomia hodi regula atitude emprezariu sira.
“Hau hanoin ita tenki iha lei krimi ekonomia, atu nunee bele regula ita nia setor privadu sira, tantu setor privadu rai laran nomos rai liur neebe halo negosiu iha TL, nunee labele manipula ka hasae presu tuir sira nia hakarak,” kestaun nee fo sai husi Autoridade lokal iha suku Remerheu, Munisipiu Ermera Martino da Costa ba STL liu husi telefone, Sesta (21/07/2023).
Nia afirma, durante nee folin sae arbiru deit, la hatene nia fukun lo-loos nee husi neebe, dala ruma iha merkadu rai liur nia folin normal hela, too iha TL nia folin sae, tanba seidauk iha lei atu regula, tan nee ba oin tenki haree didiak. No governu mos tenki iha hanoin ona, oinsa atu estabelese fali tabela presu hodi regula mos presu iha merkadu.
(mad)
