DILI, STLNEWS.co – Numeru dezempregu iha Timor-Leste (TL) kontinua aumenta, problema ne’e akontese tanba TL laiha industria ruma hodi fo servisu ba Timor oan sira.
“Kada tinan eskola sira produs universidade barak, balun akaba sekundaria la servisu, tanba durante tinan 20 resin ona ita seidauk iha industria bo’ot ida atu akomula Timor oan sira ba servisu, tan ne’e joven barak tenki husik sira nia familia hodi ba buka servisu iha ema nia rai,” dehan Visi Reitor UNDIL, Lourencio Hugo ba STL iha nia kna’ar fatin UNDIL, Kinta nee (27/07/2023).
Nia afirma, problema neebe oras nee TL hasoru mak dezempregu iha rai laran, no tinan 5 ba kotuk nasaun hasoru problema barak, hanesan impase politika, Covid-19 nomos kalamidade, problema sira nee hotu halo investor husi nasaun seluk lakon konfiansa atu mai investe iha TL.
Maibe agora sira hatene katak, governu ne’ebe lidera husi Primeiru Ministru Kay Rala Xanana Gusmao halo investor barak, hahu atu mai investe, fiar katak sei lori vantajen bo’ot ba TL no sei kria empregu iha rai laran.
Tuir relatoriu husi governu anterior katak, numeru dezempregu iha TL 37% no numeru pobreza 40% ital, hatudu duni risku boot ba TL, tanba nee ba oin atu loke kampu trabalhu laos depende deit ba governu, maibe setor privadu nomos ema idak-idak bele kria rasik kampu trabalhu ba nia aan rasik, liu husi negosiu kiik sira nee, nomos atividade seluk ne’ebe bele fo rendimentu loron-loron.
“Hau hanoin atu redus numeru dezempregu iha rai laran mak governu ida nee tenki servisu makaas, lobi investor sira mai investe, no dada mos kadoras mai TL, rua nee lao diak mak ba oin ita sei redus numeru dezempregu no numeru pobreza iha TL,” dehan Akademia ne’e.
(gui)
