Traballador Sira La Lakon Direitu Ba Suplementu Remuneratoriu

DILI, STLNEWS.co – Iha loron 2 de Juñu 2021, Konsellu Ministrus aprova Dekretu-Lei ida tan kona-ba suplementu remuneratoriu ba funsionariu publiku sira, ajentes no traballadores administrasaun publika neebe halao sira-nia atividade profisional iha servisu prevensaun ka kontrola Covid-19 ka iha kondisaun bele hetan vírus SARS-Cov2.

Liu husi komunikadu neebe STL asesu husi media PR Sesta (02/07/2021) hatete, tuir konstituisaun haruka, Governu haruka diploma nee mai Prezidente Republika tetu.

Maibe molok Dekretu-Lei foun nee tama, Governu liu husi atu lejislativu balun fo tiha ona direitu ba suplementu remuneratoriu hodi rekompensa traballador sira neebe servisu ho risku hetan moras Covid-19. Direitu nee hahu iha 28 Marsu 2020.

Tanba moras Covid-19, direitu ba suplementu remuneratoriu nee regula ho Dekretu- Lei 17/2020, hahu iha 28 Marsu 2020. Dekretu-Lei nee iha regra espesifiku ba deit tempu Covid-19 no tanba nee konta ho finansiamentu husi fundu Covid-19.

Dekretu- Lei nee la define prazu bainhira mak direitu espesífiku nee hotu. Iha 12 Maiu 2020, Governu aprova rezolusaun ho regras oioin, inklui simu pagamentu suplementu remuneratoriu fulan-fulan, tuir kategoria ida-idak nian, valor ba loron servisu halo tiha ona no sa atividade mak ida-idak halo, ho efeitu husi 28 Marsu 2020. Iha Setembru mosu Dekretu-Lei foun neebe altera ida uluk kona-ba suplementu remuneratoriu maibe la hatete bainhira mak direitu nee hotu.

Husi Marsu 2020, Governu selu deit suplementu remuneratoriu ba fulan rua Abril no Maiu 2020.

Governu justifika katak suspende pagamentu ba suplementu remuneratoriu tanba iha fulan Juñu 2020, la iha estadu emerjensia.

Biar Estadu Emerjensia la iha loron 40, husi 27 Juñu too 5 agostu 2020, risku atu hetan moras Covid-19 kontinua iha períodu nee too ohin loron. Nunee, traballador sira neebe rejista sira nia tempu servisu too ohin loron, labele lakon sira-nia direitu ba suplementu remuneratoriu.

Ho Dekretu-Lei ikus liu kona-ba suplementu remuneratoriu, karik Prezidente Republika promulga, Governu atu selu deit suplementu remuneratoriu ba traballadór sira, husi Abril 2021 too Dezembru 2021.

Maibe Prezidente Republika veta Dekretu-Lei foun nee. Ida nee la signifika katak traballador sira lakon sira-nia direitu ba suplementu remuneratoriu ba servisu neebe halo tiha ona.

Governu sei bele uza nafatin Dekretu-Lei ida uluk, numeru 17/2020, altera iha Setembru 2020, no rezolusaun neebe Governu rasik aprova tiha ona, hodi halo nafatin pagamentu ba traballador sira neebe rejista sira-nia tempu servisu iha linha de frente.

Governu bele mos halo medida foun atu regulamenta oinsa selu direitu traballador sira-nian ba suplementu remuneratoriu ba kotuk no ajusta pagamentu sira neebe preve iha orsamentu.

Se Ministériu Finansas la tau osan naton iha orsamentu tinan ida nee, Governu bele hetan dalan seluk atu nunee traballador sira labele lakon sira-nia direitu.

Haree ba konstituisaun, lei, no regulamentu hotu-hotu neebe iha relasaun ho diploma nee, mak Prezidente Republika deside veta politikamente no haruka fila ba Governu hodi hadiak no hatoo fali seluk ida, neebe hatuur prazu maibe tanen nafatin direitu traballador sira-nian.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here

NEWS UPDATE

Covid-19 Update (26 Jullu 2021): Pozitivu 6, Rekoperadu 45, & Ativu 656

DILI, STLNEWS.co - Loron 26 fulan Jullu liu Centro Integrado Gestão de Crises, Sala Situação (CIGC-SS) rejistu kazu pozitivu Covid-19 iha nain 6, Dili...

Demisaun Membru PNTL 3, PN Rekonese Bazeia Ba Regulamentu

DILI, STLNEWS.co - Parlamentu Nasional (PN) liu husi komisaun B neebe trata asuntu defeza seguransa no negosiu estranjeiru rekonese demisaun membru Polisia Nasional Timor-Leste...

Komisaun F Seidauk Aprova Projetu Lei Protesaun Ba Labarik

DILI, STLNEWS.co - Parlamentu Nasional (PN) liu husi Komisaun F trata asuntu Saude, Seguransa Sosiais no Igualidade Jeneru, seidauk aprova projetu lei protesaun labarik...
%d bloggers like this: