Turizmu Hetan Perturbasaun

Ministru Turizmu Komersiu no Industria (MTCI), Jose Lucas do Carmo da Silva. (Photo: STL News/Natalina Lopes)

DILI, STLNEWS.co – Durante COVID-19 hadaet mai iha rai laran, halo setor turizmu hetan perturbasaun, tanba turista lamai vizita Timor Leste.

Lia hirak nee hatoo husi Ministru Turizmu Komersiu no Industria (MTCI), Jose Lucas do Carmo da Silva ba jornalista sira, iha Timor Plaza, Sesta (11/09/2020).

“Hanesan ita hotu hatene katak, turizmu setor neebe hetan perturbasaun boot liu iha dezenvolvimentu iha ita nia rai laran durante periode COVID-19, signifika katak buat barak tenke halo iha turizmu, atu nunee bele lori ema iha rai liur mai vizita Timor Leste,” dehan Ministru Jose.

Nia hatutan, iha programa rekuperasaun ekonomia neebe agora dadauk governu hasai, setor turizmu hetan proposaun neebe boot, nakloke ba entidade hot-hotu neebe iha Ministeriu sei servisu hamutuk hodi fali lori fila setor turizmu ba dezenvolvimentu normal.

Iha biban nee mos governante nee hatete, peskizador husi UNTL no Mata Dalan Institutu (MDI), halo servisu neebe diak tebes, tanba peskiza sempre mai ho evidensia neebe sira hetan, ho ida nee ba governu importante tebes, tanba bele tulun governu hodi foti medidas ruma.

Maski estudu nee lakobre Timor laran tomak, maibe husi metodu neebe sira halo bele reprezenta ona Timor, hodi ajuda governu oinsa entegra iha planu neebe prepa ona.*

Reportajen: Natalia Lopes
Editora: Carme Ximenes

LEAVE A REPLY

Please enter your comment!
Please enter your name here