Uniaun Europeia Apoiu Pulsa Ba Jornalista

Uniaun Europeia (UE) no Centro de Estudos para a Paz e Desenvolvimento (CEPAD), fo apoiu internet hodi hadia konetividade jornalista lina frente sira nian iha Timor-Leste. (Foto: Uniaun Europeia)

DILI, STLNEWS.co – Uniaun Europeia (UE) no Centro de Estudos para a Paz e Desenvolvimento (CEPAD), fo apoiu internet hodi hadia konetividade jornalista lina frente sira nian iha Timor-Leste.

Liu husi karta komunikadu imprensa neebe STL simu iha Kuarta nee hatete, asesu ba internet importante tebes ba jornalista sira hodi halo sira nia servisu ho livre no akuradu, no ajuda sira atu identifika informasaun neebe la loos, notisia falsu, asegura sidadaun sira hodi asesu ba informasaun vital, no konfiavel hodi proteje sira nia an rasik husi virus Covid-19.

Iha tempu neebe presiza tebes jornalista sira, barak mak lakon sira nia rendimentu salariu koa no pagamentu neebe atraza, tanba situasaun ekonomika neebe hamenus no restrisaun sira neebe estadu emerjensia impoin.

Nunee, Uniaun Europeia no CEPAD, halo akordu ho Asosiasaun Jornalista Timor Leste (AJTL) no Uniaun Imprensa Timor-Leste, fo kartaun pulsa telefoniku ba jornalista hamutuk 450, ho folin US$ 10 kada ema, hodi tulun selu internet no komunikasaun.

“CEPAD fiar katak informasaun ba publika neebe konfiavel no loos nee importante tebes, liuliu durante tempu krize Covid-19 nian nee, no CEPAD sente privilejiadu atu apoia media hodi garante katak informasaun sira nee asesivel ba publiku”, dehan Diretor Ezekutivu CEPAD, João Boavida.

Nunee mos Embaixador Uniaun Europeia ba Timor-Leste, Andrew Jacobs hateten, “Defikuldade ba sirkunstansia ekonomika neebe kauza husi Covid-19, signifika katak jornalista sira nia fonte hodi buka moris hetan ameasa iha tempu neebe ita presiza tebes. Ohin hau sente orgullu tebes atu suporta inisiativa ida nee.”

Jornalista sira presiza iha meius atu halo relatoriu ida neebe loloos no tuir tempu, atu nunee publiku bele hetan informasaun konaba surtu Covid-19, oinsa atu proteje sira nia an no hirak neebe sira hadomi, no oinsa mak halo funu hasoru Covid-19. Sei la iha tempu neebe importante liu ba media neebe livre, no media independente laos deit atu moris, maibe atu dezenvolve an mos. Jornalismu independente importante tebes atu fo asesu publiku ba informasaun neebe loloos no kontra informasaun la loos konaba pandemia nee.*

Reportajen: Emerenciana Pinto
Editor: Domingas Gomes

LEAVE A REPLY

Please enter your comment!
Please enter your name here