DILI,STLNEWS.co – Ministeriu Publiku (MP) liu husi nia alegasaun ba krimi pekulatu, husu tribunal atu aplika pena prizaun tinan 3 ba arguidu DA, tanba faktus provadu hotu.
Alegasaun ne’ebe halao iha Tribunal Judisial Primeira Instansia Dili, Tersa nee (18/04/2023), Prokuradora Lidia Soares deklara, ba prosesu ida ne’e akuzasaun ne’ebe iha provadus hotu, bazeia ba arguidu nia deklarasaun.
Tanba ne’e, mezmu arguidu seidauk devolve hotu osan nee, maibe arguidu devolve ona montante US$ 1,800.00, no promete sei devolve hotu osan ne’e. Tanba nee, Prokurador husu atu ba oin arguidu devolve osan ne’e tuir desizaun ne’ebe tribunal fo.
Liu husi alegasaun, prokuradora nee solisita ba tribunal atu aplika pena prizaun tinan 3 suspende tinan 3 ba arguidu, no husu atu arguidu devolve hikas osan ne’e iha fulan neen nia laran, se la devolve husu atu arguidu kumpri prizaun tinan 3.
Enkuantu, husi parte defeza nian husu tribunal atu aplika pena ne’ebe justu ba arguidu, tanba haree katak arguidu koopera ho justisa, no promete sei devolve hikas osan refere.
Rona tiha alegasaun nee, tribunal hadia hikas julgamentu nee ba iha loron seluk hodi rona desizaun.
Audensia julgamentu nee prezide husi juiz koletivu, Ana Paula, Ersilia de Jesus, Albertina Neves, MP reprezenta husi Prokuradora Lidia Soares, arguidu hetan asistensia legal husi Defensora Publika Agustinha de Oliveira.
(ter)
