DILI, STLNEWS.co – Relasiona ho proposta orsamentu retifkativu neebe VIII Governu aprezenta ba iha Parlamentu Nasional (PN), tau mos atu fo subsidiu ba komunidade US$ 200 kada uma kain iha fim du anu, ida nee deputadu iha PN apoiu, tanba bele fasilita netik komunidade iha situasaun agora.
Tuir Deputadu Bankada Governu atual Bankada KHUNTO, Antonio Verdial katak, haree ba proposta orsamentu retifikativu atu fo mos US$ 200 ba komunidade kada uma kain, planu neebe governu trasa hanesan deputadu bankada governu sei asegura planu neebe mak governu trasa ona, atu nunee bele ajuda komunidade sira.
“Ida nee husi governu hakarak fo US$ 200 iha fim du anu, karik atu aumenta ka lae, maibe agora mantein lai ho planu neebe mak governu nian, katak US$ 200, nunee fasilita lai komunidade iha situasaun agora haree ba folin sasan sae hotu hodi hein tinan oin ita haree fila fali,” katak Verdial ba jornalista, Kinta nee (05/05/2022) iha PN.
Nia hatete, governu nia seriedade atu tulun komunidade sira liu husi orsamentu ida nee, atu nunee apoia komunidade sira iha fim du anu.
Entretantu, deputada husi Bankada CNRT, Virgina Ana Belo iha audensia publiku hatete, iha orsamentu retifikativu nee tau mos US$ 200 atu fahe ba komunidade kada uma kain, iha nee hanesan politika ida deit atu kumpri promesa neebe mak koalia iha kampanha eleisaun prezidensial. Maibe governu nee iha duni interese atu apoia no ajuda komunidade, entaun osan nee se bele hasae tan atu nunee bele apoia komunidade sira iha situasaun agora.
(gui/dom)
