Xanana Gusmão Kontinua Hakaman Povu Nia Sofrimentu

DILI, STLNEWS.co – Populasaun afetadu ba inundasaun Aldeia Karau Maten, Suku Ailok, Postu Administrativu Cristo Rei, Munisipiu Dili hatoo agradese ba lider karismatiku, Kay Rala Xanana Gusmão neebé kontinua hatudu domin hodi fo apoiu aihan baziku no roupa, hodi hakaman povu nia sofrimentu durante periodu inundasaun akontese iha fulan Abril nee.

Tuir responsabel Bairru Aldeia Karau Maten, Liciano Pereira katak, vitima afetadu ba inundasaun sira konsidera apoiu nee mezmu kiik maibé iha valór domin neebé boot hodi hakaman povu nia terus.

“Ami hatoo agradese apoiu nee kiik ka boot, importante liu maka apoiu nee too mai hodi fahe ba ita nia inan feto no povu sira neebé sofre iha inundasaun, hodi hakaman sofrimentu, tanba too agora governu nia apoiu seidauk too mai, maibé maun Xanana ami haree fahe iha fatin barak, no ohin too mai ona,” dehan Liciano liu husi karta komunikadu imprensa neebe STL asesu, Sesta (07/05/2021).

Nia dehan, inundasaun nee akontese konsege estraga uma kain 80 nia sasan no uma hetan estragus. Enkuantu, sasan neebe apoiu hanesan foos saka 25, mina 25, koto kilu 25, masin 90, supermie kaixa 25, deho kalen 125, masib midar 25, kafe pakote 25 ba vitima 80 hodi bele hetan asaun.

Apoia Povu Aldeia Bua-Resburioen

Ekipa Sekretariadu Apoiu Atividade Maun Boot Kay Rala Xanana Gusmão entrega kain batik ba povu. (Foto: Espesial)

Entretantu iha parte seluk, Ekipa Sekretariadu Apoiu Atividade Maun Boot Kay Rala Xanana Gusmão iha semana nee entrega mós apoiu aihan roupa, kain batik no solar panel ba povu Aldeia Bua, Suku Uma Naruk no Aldeia Resburieon, Suku Uma Kaduak neebé hetan dezastre iha loron 4 no 5 Abril 2021.

Apoiu nee entrega iha loron liu ba, neebe fo direita ba Administrador Postu Administrativu Laclo, Samuel Rogriques Pereira hodi fahe kedas ba vitima afetadu sira.

Tuir Administrador Laclo Samuel dehan, Aldeia Bua no Aideia Resburioen husi Postu Administrativu Laclo durante Timor-Leste ukun aan too agora moris izoladu husi dezenvolvimentu, tanba la asesu ba estrada, eletrisidade desde tinan 1999.

Aldeia Bua nuudar fatin istoriku no abrigu rezidensia neebé Segundu Komandante FALINTIL, Taur Matan Ruak ho nia elementu sira subar hodi halo geurilia ho povu sira.

Populasaun sei lembra nafatin istoria pasadu neebé nunka bele lakon iha sira memoria katak, iha tempu funu Taur sai husi Manatuto Vila ba Postu Laclo hela iha Tia Maria nia uma ka eis edifisiu PLN Laclo nian.

Depois hela iha fatin neebá, Taur ho nia membru FALINTIL sira muda ba Aldeia Bua depois liu ba Suku Liurai-Remaxio hodi kontinua viaze ba Becora-Dili no ba Aitana.

Ho dezatre neebé akontese, povu sira husu ba Taur Matan Ruak nuudar xefe governu atu lori netik apoiu aihan hodi ajuda vitima sira.

Inundasaun neebe akontese estraga mos povu sira nia natar 5.000 hektares hetan estragus totál no povu barak nia uma hetan inundasaun no bee mota lori sasán uma laran hodi halo povu kontinua moris mukit.

Iha fatin hanesan, Sekretariadu Apoiu Atividade Maun Boot Kay Rala Xanana Gusmão, Tomás do Rosario Cabral dehan, apoiu husi Maun Boot Xanana hodi tulun vitima sira.

Dedde dezastre inundasaun akontese iha Timor-Leste, maun boot Xanana preokupa ho vida umanu povu nian, no Xanana kontinua vizita tama sai bairru sira iha Dili laran hodi observa direta sofrimentu neebe povu hasoru no buka kontaktu Timoroan sira iha rai laran no rai liur lolo loman apoia povu nuudar jestu solidariedade tulun Timoroan sira neebé moris iha susar nia laran.

Dadaun nee, Xanana seidauk bele vizita ba haree vitima sira iha munisipiu, tanba estadu emerjensia no serka sanitária.*

Reportajen : Guilhermina Franco
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun; EP1

STLNEWS.co – Publisidade Husi Ministério dos Assuntos Parlamentares e Comunicação Social (MAPCOMS) Konaba Covid-19 & Vasinasaun • EPISODE 1: Drama Kakaluk Ba Corona https://youtu.be/VQBkF8ES8GE • dr. Odete Maria Freitas Belo,...

TL Seidauk Tempu Ba Expo Dubai

DILI, STLNEWS.co - Timor Leste atu partisipa iha Expo Dubai, maibe haree ba situasaun agora povu sofre ba situasaun Covid-19 no kalamidade, tanba nee...

Akontesementu Meza PPN Rahun; MP Notifika Deputadu CNRT Nain 8

DILI, STLNEWS.co - Relasiona ho akontesementu meza Prezidente Parlamentu Nasional (PPN) rahun iha loron 18-19 Maiu 2020, Ministeriu Publiku (MP) fo ona karta notifikasaun...
%d bloggers like this: