Xanana Mobiliza Manatuto Oan Apoia Vitima Dezastre Naturais

Lider Karismatiku, Kay Rala Xanana Gusmão organiza intelektual Manatuto oan, hatudu sira nia solidaridade no domin fo apoiu aihan bazika ba vitima dezastre natural nain 520, iha Munisipiu Manatuto. (Foto: STL/Crisogono Magalhães)

DILI, STLNEWS.co – Lider Karismatiku, Kay Rala Xanana Gusmão organiza intelektual Manatuto oan, hatudu sira nia solidaridade no domin fo apoiu aihan bazika ba vitima dezastre natural nain 520, iha Munisipiu Manatuto.

Abitante nain 520 kompostu hosi suku lima (5) hanesan, Suku Uma Kaduak, Lacu Mesak, Uma Naruk, Laicore, no Uma Caduak, Postu Administrativu Laclo no Manatuto Vila neebe sofre dezastre natural, hafoin udan boot iha loron, Domingu (04/04/2021).

Apoiu aihan bazika nee kompostu husi fos saka 30, supermi 30, ikan sardina kaixa 10, rinso kaixa 5, mina 1 liter kaixa 5, masin midar karon 5 no seluk tan.

Lider karimatiku Xanana Gusmão dehan, mezmu aihan neebe apoiu ho volume kiik, maibe nuudar jestu solidariedade hanesan Manatuto oan hodi tulun vitima sira neebe hetan susar.

Xanana fo hanoin ba vitima sira katak, dezastre neebe akontese laos mosu deit iha Timor Leste, maibe povu nasaun vizinu sira iha Kupang, Indonezia mos sofre hanesan ho povu Timor Leste, tanba ema mate, sasan no uma hetan estragus, inklui animal sira hanesan, karau, bibi no fahi mate, tanba bee lori.

“Apoiu nee hodi tulun diak povu sira imi nia sofrimentu, tanba momentu sira hanesan nee ita presiza hatudu ita nia domin hodi tulun sira neebe sai presiza atu hetan tulun,” haktuir komunikadu neebe STL asesu iha Tersa (06/04/2021).

Entretantu, hafoin udan boot iha loron Domingu, Xanana Gusmão ho nia seguransa sira halo vizita ba haree direita vitima sira mota sobu sira nia uma iha Bidau, Becora, Manleuna, Comoro no fatin seluk tan hodi espresa ninia domin ba povu.

Eis lider rezistensia nee, enkoraza Timoroan hotu atu la lakon esperansa ba dezastre natural neebe akontese no husu atu nafatin kolabora malu hodi nunee bele ultrasa lalais situasaun krusial nee.

Iha tempu hanesan, Xanana halo vizita solidariedade ba haree komunidade sira neebe refujiadu iha area Don Bosco Comoro, Madre Canossiana Manleuana, Becora, no Hera.

Iha fatin hanesan, Administrador Laclo, Samuel Rodrigues Pereira, hatoo agradese ba apoiu hosi Lider Kay Rala Xanana Gusmão ho intelektual Manatuto oan sira.

Autoridade sira nee preokupa dezastre natural neebe akontese provoka udan, anin halo inundasaun makaas rezulta ema nain neen (6) mate no ida buka hetan ona no vitima nain lima (5) buka seidauk hetan.

“Dezastre nee rezulta komunidade hamutuk 6 mak lakon vida, entre vitima nain 6 nee nia mate isin too oras nee daudaun foin hetan mate isin nain ida (1), no mate isin nain lima (5) seluk seidauk hetan too agora,” nia hatete.

Dezastre nee estraga direita povu nia natar kuaze 5000 hektatares no estraga toos hamutuk 200 hektares. Mota sobu mos kolam ikan 60 neebe atu koilleta daudaun. Dezastre nee estraga mos plantasaun aihan no komunidade nian animal karau luhan 6, bibi luhan 5, inklui animal kiik sira seluk hanesan malu mota lori.

Aleinde nee, mota estraga mos estrada ligasaun obrato ba Postu Administrativu Laclo, defikulta tebes transporte publiku no privadu, la bele halo movimentu total. Estrada ligasaun Laclo Centro Posto Administrativu ho distansia metru 700 neebe iha tinan 2019 hetan rehabilitasaun husi kompania Egana Unip.Lda, ninia obra rehabilitasaun nee la konsege hotu no mota sobu kotu total, fo impaktu direitamente ba movimentu transporte.

Tuir dadus neebe autoridade sira rekolla, uma kain tolu (3) hetan estragus total iha Postu Administrativo Laclo. Uma kain 25 bee tama no uma kain 28 sai ameasa boot ba inundasaun.

Oras nee daudaun komunidade sira evakua provizoriu ba sede suku neebe besik no salaun parokia hodi hein too situasaun rekupera, sira sei fila hodi hadia sira nia fatin.*

Reportajen: Alberto Menezes
Editor: Crisogono Magalhães

LEAVE A REPLY

Please enter your comment!
Please enter your name here