Xefe Casa Sivil Ho Espoza PR Fahe Nesesidade Bazika Ba Vitima Inundasaun

Xefe Casa Sivil Francisco Maria De Vasconcelos ho espoza Prezidente Republika (PR) Cidalia Nobre Mouzinho Guterres, fahe nesesidade bazika ba vitima afetadu inundasaun iha Dili laran hanesan iha Aitarak Laran, Bedois, Klafuik, no Kakeu laran. (Foto: STL/Emerenciana Pinto)

DILI, STLNEWS.co – Xefe Casa Sivil Francisco Maria De Vasconcelos ho espoza Prezidente Republika (PR) Cidalia Nobre Mouzinho Guterres, fahe nesesidade bazika ba vitima afetadu inundasaun iha Dili laran hanesan iha Aitarak Laran, Bedois, Klafuik, no Kakeu laran.

Xefe Casa Sivil no espoza Prezidente Republika, kontinua presta solidariedade Xefe Estadu nian liu husi apoiu umanitaria ba família afetadu iha fatin konsentrasaun Ministeriu Finansas Aitarak-Laran, iha Igreja Bedois, Aldeia Klak-Fuik no Kakeu-Laran.

Iha loron datoluk, Prezidente Repúblika Francisco Guterres Lú Olo liu husi nia espoza Cidália Nobre no Xefe Casa Civil ho nia parseiru PLAN International, Rede Feto no Fundasaun SADIA fo apoiu ba bairru hanesan Ministeriu Finansas Aitarak-Laran, igreja Bedois, Aldeia Klak-Fuik fahe nesesidade Bazika hanesan fos, mina, supermi, biskuit, energen, indomilk, jus, masin midar, masin, sabaun, pepsodent, eskoba, manta, biti, ho seluk tan.

Espoza Prezidente Republika no Xefe Casa Civil nia prezensa iha vitima afeta dezastre naturais, hodi fo korajen no husu nafatin vitima sira nia kondisaun konaba saude no uma hela fatin.

Tanba iha fatin familia afetadu hela ba, maioria husi labarik klik no bebe, ferik no katuas balu nia sofre hela moras. Ho nunee espoza Prezidente Republika husu ba responsabel kada fatin familia sira hela, komunika malu nafatin ho parte kompetente karik kazu moras.

Reprezentante komunidade afetadu iha Ministeriu Finansas Aitarak-Laran, Duarte Sarmento liu husi nia aprezentasaun Kinta lokraik (08/04/2021) hatoo agradese tebes tanba hetan vizita husi Xefe Casa Sivil no espoza PR rasik.

“Ami agradese tebes ba espoza Prezidente Republika tanba vizita ona ami no apoiu netik sasan ruma ba ami, atu too ka la too nee la importante, tanba dezastre nee akontese iha fatin barak,” Duarte, hatete.

Aleinde nee, komunidade sıra iha Aldeia Klak-Fuik, Suku Bekora, kontente ho prezensa espoza PR ho Xefe Casa Sivil iha sira nia leet, hodi haree rasik dezastre naturais neebe mak afeta makaas ba aldeia Klak-fuik no Kakeu-laran.

Sira agradese ho apoiu umanitaria, maibe nesesidade neebe mak sira presiza liu mak suru sai rai no fatuk neebe taka tomak tiha mota ligasaun husi Beduku too iha Eskola Sekundariu Jeral 5 de Maiu.

Hatan ba kestaun nee, Xefe Casa Sivil Francisco Maria De Vas Concelos afirma katak, sei koordena ho Ministeriu Obras Publiku atu haruka ekipamentu pejadus, suru sai rai no fatuk nunee bele normaliza mota.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here