XG – Timor Oan Iha Rai Liur Apoiu Hahan Ba Orfonato Dominikana Manatuto

DILI, STLNEWS.co – Lider karismatiku Kay Rala Xanana Gusmão hamutuk ho Asia Fundation ho amigos Chinesa sira iha Australia no mos Timor oan iha rai liur, kontinua fo apoiu ba madre sira iha orfonato Dominikana Salau Manatuto hodi atende ba labarik nain 35.

Tuir Madre Alzira Fátima dos Reis husi Missionário Dominikana Salau Manatuto hatete, sira sente kontente tebes tanba hetan apoiu hahan husi Avo Nana ho nia ekipa sira husi rai liur ba sira hodi atende labarik nain 35, neebe mak kompostu husi 13 munisipiu.

“Ami kontente tebes hetan ajudu ida nee, tanba bainhira hatoo ami nia pedidu ba Avo, no ami hetan resposta lalais, neebe ami kontente tanba haree ba agora estadu emerjensia no serka sanitaria labarik sira nia inan aman susar atu mai haree”, katak Madre Alzira ba STL iha Hera, Sabadu (24/04/2021).

Madre nee dehan, apoiu ida nee sufisiente hodi atende ba labarik sira, i ida nee hanesan grasa ida neebe Avo Nana hamutuk ho Timor oan sira iha rai liur, tanba nee hatoo agradese.

Tuir Madre nee katak, Xanana nee Lider ida neebe nunka taka matan ba povu, tanba maske sira dok maibe bainhira hatoo pedidu, hetan kedas resposta.

Nunee mos Tomas Cabral hanesan Sekratriu Apoiu Solidaridade Maun Boot Kay Rala Xanana Gusmão hatete, apoiu iha fatin 2, ida Manatuto oan sira apoiu ba komunidade sira neebe afeta inundasaun hamutuk 369 familias, no mos apoiu ba madre sira ho labarik sira iha orfonatu nee balu mai husi Asia Fundation, balu mai husi kolega no amigos Chinesa sira iha Australia.

Nia dehan, apoiu Manatuto oan nee ba komunidade sira neebe afeta ba inundasaun i estrada aat, uma estragus hanesan iha postu administrativu Laklo nee kuaze 80%.

“Enkuantu apoiu neebe fo madre sira nee tanba haree ba situasaun agora Iha orfonatu nee labarik sira iha 30 resin, ho kondisaun hanesan nee horiseik madre sira kontaktu ami, ami informa ba maun boot Xanana, tanba nee maun boot mos dehan fo lai apoiu neebe hodi sira aguenta lai. Tanba nee ohin entrega fos, supermie, deho, rinso, mina, ho apoiu sira nee hodi sira aguenta lai, hodi hein identifika tan mak sei apoiu fali.” dehan Tomas Cabral.

Tuir nia, apoiu asistensia nee fo para madre sira hodi atende lai labarik sira, tanba durante nee madre sira seidauk hetan apoiu husi se deit, tantu governu, sosiedade sivil, no seluk seluk tan. Enkuantu apoiu nee entrega direta ba madre sira iha fronteira Dili – Manatuto.*

Reportajen: Guilhermina Franco/Madalena Horta
Editor: Ekipa STL

LEAVE A REPLY

Please enter your comment!
Please enter your name here