Xina Hadau Malu Faan Sasan Rahun

Foto: STL/Jacinta Madalena Horta

DILI, STLNEWS.co – Timoroan kestiona sidadaun Xina sira, neebe durante nee hadau malu faan sasan rahun, tanba Timoroan mos bele halo negosiu ida nee.

“Hau hanoin iha Munisipiu Baucau, hau hanoin sembako nee sira seidauk tama iha neeba, maibe iha Dili nee sira barak mak kompete ho ami, maibe ami husu ba governu, sira labele faan fali sasan rahun, neebe mak ami Timoroan mos bele faan, no sira labele faan fali sasan ida nee, tanba sira nee ema estranjeirus, liu-liu sidadaun Xineza sira, tuir lolos sira nee lori modal boot mai, ami Timoroan mak atu sosa sira nian, laos sira mak atu faan fali sasan ba ita, nee ami hanesan Timoroan nee, ladun kontenti, neebe husu ba governu, atu fo atensaun ba sira, para Xina sira labele faan sasan rahun, hanesan supermi, masin no seluk, sasan hirak nee, Xina labele faan ba Timoroan sira, tanba ida nee Timoroan halo tiha ona, entaun nusa mak sira mai nee tenke halo foun ida,” dehan Agostinho ba STL iha armajen perissos Fatuhada,Dili, Tersa (23/02/2021).

Nia hatete, Xina sira mai iha Timor nee, sira tenke halo investimentu neebe mak boot, para bele fo servisu ba Timoroan sira, maibe agora nee sira halo kompetisaun, hanesan faan sasan rahun, nee nudar Timoroan la kontenti ho ida nee.

“Ami nian mensajen fo hatene ba governu, sebele karik Xina sira atu faan sasan iha Timor nee, ninia modal nee boot mak sira mai iha TL, maibe ho osan neebe mak 1000 ou 2000, nee sira lalika tama iha Timor, nee hau hanoin ami Timoroan mos bele halo ida nee. Ita hatene katak, agora dadaun nee Xina sira faan sasan rahun nee barak, hau hanoin sira mak barak liu fali ita Timoroan sira,” dehan nia.

Agostinho dehan, estranjeirus sira mai iha TL, sira tenke lori osan barak, para halo investimentu neebe boot, hodi fo servisu ba Timoroan sira, agora faan sasan hanesan ho Timoroan sira bele halo, sira mos hadau malu fali ida nee, tuir lolos sasan rahun neebe mak ohin temi nee, sira labele faan ida, tanba sira ema estranjeirus, tenke mai halo investimentu neebe mak boot.

“Ita hatene katak, ema sira nee mai lori osan barak, para sira halo buat seluk, depois sira mos bele fo kampu servisu ba ita Timoroan sira, agora supermi, masin, ida nee mos sira faan hadau malu ho ita, oinsa mak ita nian negosiu bele lao ho diak, nudar Timoroan sempre kestiona ida nee, tanba faan sasan rahun nee, ita mos bele halo, nusa mak estranjeirus mak halo. Ita haree iha fatin-fatin, ema sira nee faan sasan barak, sasan sira ohin hau temi nee, ida nee mos sira mak faan domina fali ita nee, hau hanoin ida nee hau sente ladun diak,” afirma nia.

Iha parte seluk, Prezidente CCI-TL, Oscar Lima, dehan, tuir lolos ema sira nee mai lori osan neebe barak, para mai halo investimentu, agora sira mos mai faan hotu sasan rahun, se sira mai halo negosiu bai-bain, nee Timoroan rasik mos bele halo.*

Reportajen: Jacinta Sequeira/Madalena Horta
Editor: Ekipa STL

LEAVE A REPLY

Please enter your comment!
Please enter your name here