DILI, STLNEWS.co – Xina laos mai loke kios deit, maibe Xina mai halo ona toos iha Timor Leste (TL), liu-liu kuda modo hodi hatama fali mai loja Timor oan sira nian.
“Tristi haree atividade iha TL nakonu ho Xina, sira mai laos atu loke kios kiik hodi taka dalan ba Timor oan sira, maibe sira mai hola parte hotu hanesan povu agrikultor hodi halo toos iha rai laran, produs modo lori tau iha loja. Lo-loos servisu sira hanesan nee ita nia inan aman sira iha foho mak halo, laos ema estranjeiru,” preokupasaun nee hatoo husi Feto Emprezarial, Leoniza Ximenes ba STL liu husi telefone, Kinta nee (20/04/2023).
Nia katak, tanba saida mak nasaun Timor Leste sai tiha hanesan nee, inan aman sira baruk ona atu halo natar ho toos, nunee Xina uza oportunidade nee hodi kuda modo iha rai laran, signifika Xina mai moris hanesan povu agrikultor iha TL, karik ida nee tanba adopta merkadu livre ka oinsa, nee mak fo oportunidade ba estranjeiru hodi mai okupa atividade hotu, tanba nee atu labele hamate povu iha rai ida nee mak governu tenki haree, regula sira, laos mai raut hotu, no Timor oan sai penonton iha nia rai rasik.
Tuir nia katak, Xina mai loke kios kiik nee ladun iha problema, tanba parte ida fo servisu ba Timor oan sira, maibe hola parte hotu iha vida agrikultor hodi produs modo, nee labele akontese tan iha rai ida nee, no husu governu tenki toma atensaun, se lae mak rai mamuk sira nee sei domina hotu husi Xina.
(mad)
