5 de setembro de 1999

Dom Carlos Filipe Ximenes Belo (Photo: STL News)

STLNEWS.co – Loron 5 fulan Setembru 1999, loron domingu ida. Selebra tiha Misa iha Lecidere, ho ema besik rihun lima, ha’u ho Dr. Manuel Abrantes ho motorista Maukai liu ba Motael atu kolia ho Bupati Domingos Maria Soares (Coli). Maibé, ami la hetan nia. Ami mos, tama senhor Governador Abílio Soares nia Uma atu husu nia oin sa bele tulun hapara violênsia. Maibé governador dehan: “Amu Bispo, há’u mos hetan susar, ema ameasa tan, atu halo nusá?”Tuir mai, ami liu ba Aeroportu Comoro atu simu komitiva ne’ebé to’o hosi Jakarta: Ministro dos Negócios Estrangeiros, Ali Alatas no Pangab Jeneral Wiranto. Iha sala VIP Comoro há’u hetan malu ho Señor Ian Martin no señor Mau-Hudo, ne’ebé konta katak molok nia ba Comoro, nia liu hosi Fatuhada (Madre Carmelita) atu husik hela nia oann sira iha ne’ebá. Aviaun ho boot sira tun tiha, hala’o reuniaun ida iha sala VIP: Ministro Ali Alatas, sr. Ian Martin no Bispo. Ali Alatas mak ko’alia uluk, maibé ninia liafaun kroat los, hasoru Ian Martin, hodi haktuir katak ONU mak organiza sala “Jajak Pendapat”. Momentu ne’ebá atan há’u hanoin fali señor Ian Martin…Koitadu! Tan ba nia nonok de’it no rona Minstri Alas koalia …

Tuir mai, ema fó hatene atu ami liu ba Farol, ba Panglima nia Uma (RtPANG). Iha ne’ebá, tuir reuniaun ida hamutuk ho Jeneral Wiranto no ofisiál seluk; tuir mos reuniaun ne’e reprezentante hosi CNRT, señor Leandro Isaac, reprezentante hosi Falintil (Sr. Mau-Hudo), hosi FDPK (Domingos Soares no Armindo Mariano), UNAMET (Sr. Ian Martin), Diocese Diíi (Administrador Apostólico no Dr. Manuel Abrantes). Jeneral Wiaranto hamutuk, hato’o katak ABRI serbisu maka’as atu kria klima de “segurança e paz”. Sira husu há’u atu hato’o liafuan ruma: Há’u aproveita no husu Bapak Pangab, atu haruka hasai tiha ai-riin ka ai-sanak no au ne’ebé milisia no tentara sira tau iha dalan atu halo revista no baku refugiados ka pengunsi sira; no bele karik, haruka milisi sira sees hosi dalan, hosi Dili to’o fronteira (Batugadé), atu karrreta no motór sira bele liu “à vontade”.

Reuniaun hotu tiha, há’u ho Dr. Manuel Abrantes fila ba Lecidere. La kleur deit, Joven Aderito Ruben, bolu: “Amu, Amu, ema sunu Câmara Eclesiástica!”. H’au sai hosi uma ba jardim hodi hateke ba zona Câmara Eclesiastica nian ; ahi-sura metan maka sa’e hela ba lalehan. Ikus mai m há’u rona ema tama Câmara haruka amu lulik sai hotu no hahú baku no hakanek ema balu ne’ebé subar iha ne’ebá. Amu-lulik, empregadu no refujiadu barak ne’ebé hela iha Câmara Eclesiástica hetan susar todan. Loraik no kalan ne’ebá ahi han dadaun didin sira to’o uma kakulu, halo edifisiu/gedung Camara Eclesiástica nafilak ba ahi-kdesan. “Meu Deus!” Dioseze Dili lakon baut barak: arquivo, dokumentu, livru, mobiliariu no sasan seuk.Ema subar iha ne’eba, na’in 25 hetan mate no barak mak kanek.

Hatutan pajina 2

LEAVE A REPLY

Please enter your comment!
Please enter your name here