APÓSTOLU SÃO BARTOLOMEU (24 de agosto)

Dom Carlos Filipe Ximenes Belo (Photo: STL News)

STLNEWS.co – Iha loron 24 fulan Agostu, Uma-Kreda halo Festa Apóstolu Bartolomeu. Iha ninia Evanjellu Sal João temi nia naran Natanael. Iha Evanellu Sinóptikus (Mateus, Markus, Lukas), nia naran Bartolomeu. Bar-Talmay, dehan katak Talmay nia oan. Natanael katak (Maromak fó); nia hosi rai Caná. Iha knua ida ne’e mak N’ai Jezus halo milagre ba dala uluk hodi nakfilak bee ba tua.

Natanel hasoru Jezus iha Galileia, wainhira Apostolu Filipe dehan ba nia, katak sira (Pedro, André, Tiago, João ho nia) sira hetan Messias, ne’ebé Moisés no Profestas sira temi no hakerek nanis tiha ona kona ba Nia. Filipe hatan: “Hosi Nazaré bele mosu buat diak ruma?”. Filipe hatan: “O mai haree de’it”.Jezus haree Natanael ne’ebé la’o daudaun ba hasoru Nia. Na’i dehan: “ema ida mai daudaun ne’e, israelita lolós kedas, nia la hatene finje…”Natanel hatan: “Na’i hatene há’u hosi ne’ebé?”. Jezus hatan: “Molok Filipe bolu o, há’u haree tiha ona o, iha ai figueira okos”. Kona ba ai-figueira ne’e, ema balu dehan katak ih Judeia, no rai sira ne’ebé manas, ema kostuma tuur iha mahon no ai okos atu deskansa ka halo serbisu ruma ka lee livru. Rona a Jezus nia lia-fuan hirak ne’ebá, Natanael hateten: “ Raibi, Ita boot, Maromak nia Oan!”. Na’i hatan hikas: “ O fiar tan ba hau dehan haree o iha ai-figueira okos,? O sei haree buat seluk boot liu ida ne’e.”. Tuir mai, nia dehan teni: “Tebes, tebes duni, imi sei haree Maromak nia anju sira tun sa’e hodi Oan Mane mesa nia kbiit”-

De facto, Natanel ka Bartolomeu tama grupu 12 ne’ebé bolu Apóstolu. Sira hela hamutuk ho Jezus iha tinan tolu nia laran. Bartolomeu haree buat kmanek oin oin ne’ebé Na’in Jezus halo. Nia mos asiste mistériu sira, hanesan Jezus nia terus, mate no moris hi’as. Nia hamutuk ho apóstolu seluk iha uma Senákulu, wainhira Maromak Espiritu Santu tun hosi Lalehan. Tradisaun haktuir katak Bartolomeu-Natanel hala’o apostoladu iha Índia. Eskritór balu fali dehan nia halo pregasaun iha Mesopotâmia, Pérsia, Egipto, Licaónia, Frígia. Nia mate hanesan mártir. Ema lees no hasai nia kulit, hafoin taa kotu nia ulun-fatuk. Lia menon n’ebé Bartolomeu ható’o mai, mak ne’e: Na’i Jezus bolu ona ita, ita tenki tuir nian to’o mate.


Lisboa, 23 de agosto de 2020
Dom Carlos Filipe Ximenes Belo

LEAVE A REPLY

Please enter your comment!
Please enter your name here