Felicidade (felisidade, ka laran no néon ksolok)

Dom Carlos Filipe Ximenes Belo (Foto: STL)

STLNEWS.co – Hori uluk hori wa’in diabu ka satanás sira halo reuniaun boot ida.Sira libur hamutuk ati kesi lia no tau lasu ba ema/umanidade.

Diabu xefi dehan: Ita “devia” hasai tiha buat ruma hosi ema sira!…Maibé, ita sei hasai saída los? Husu didiak tiha diabu sira hotu, diabu katuas ida hatan:- “Há’u hatene ona. Ita sei hasai hosi ema “felicidade/felisidade” (laran néon kosok). Maibé, iha problema ida. Ita sei subar felisidade ne’e iha ne’ebé, atu sir labele hetan?”

Diabu seluk hateten: “Ita ba subar iha foho aas liu iha mundu ne’e nia tutun.” Diabu seluk teri netik: “Lae! O hatene katak ema sira ne’e matenek no iha kbiit maka’as. Ema bele sa’e fo’o no hetan. Nia hetan tiha, nia maluk sira sei hatene felisidade iha ne’ebé”.

Diabu ho otas 50 fó hanoin: “ita ba subar iha tasi-kidun (tasi laran)”. Diabu seluk hatan: “Labele! Ema sira ne’e kuriozu liu. Sira bele halo mákina atu tun ba tasi laran no hetan felisidade”.

Diabu ferik idaa dehan:” Ita ba subar tiha felisidade iha fitun ka planeta seluk iha lalelah ne’ebá, nune’e sira la bele to’o”. Maibé, diabu feto seluk hatan: “Ida ne’e mos la diak. Ema sei halo foguetaun ka nave atu ba to’o iha ne’ebá, no sira sei hetan”.

Ikus , diabu ida ne’ebé katuas liu ona, fuuk mutin, krekas maran, tur hela iha sikun, nonok de’it hodi rona diabu seluk nia sujestaun, nia hateten :

“Há’u hetan ona dalan ida atu subar felsidade! Ita sei subar iha fatin ne’ebé, ema ida la bele deskobre”. Sirak seluk hatan:- “Iha ne’ebé?

Nia hatan: “ita subar felisidade iha ema nia laran rasik. Tan ba to’o oras ne’e sira fadigadu buka felisidade iha liur. Buka iha rai seluk hodi ba pasear ka halo turizmu; sira bukan iha osan, iha futebol, iha filme, iha hahán, iha ropa, iha ema mane bonito, no ema feto bonita, iha politika, iha fama, iha uma andar, iha karreta ho vidru metan. Maibé, felisidade ne’e iha hela sira nia laran no sira nia néon…Iha fatin ida ne’e de’it mak sira seidak tama. Sira fadigadu buka iha liur. Nunka tama iha sira nia laran. Iha ne’ebá mak felisidade nia fatin no abut….”. Diabu hotu hotu basa liman no hatan: “Tebes, ita sei subar felisidade iha ema nia laran duni!!!”

Lisboa, 17 de outubro de 2020
Dom Carlos Filipe Ximenes Belo

LEAVE A REPLY

Please enter your comment!
Please enter your name here