Prezidente Lú Olo Selebra Tinan Moris Ba dala 67

DILI, STLNEWS.co – Edisaun Kinta, loron 9 fulan Setembru tinan 2021 konvida maluk lee nain sira sei hamutuk ho Prezidente Republika (Xefe Estadu) Francisco Guterres Lú Olo neebe selebra ninia loron moris. To’o tinan ida nee, Xefe Estadu ninia idade halo tinan 67 (7 Setembru 1954-7 Setembru 2021).

Nia moris iha Ossu, Viqueque. Oan doben husi Felix Guterres no Elda da Costa Guterres. Nia oan ba dala-6 husi maun alin nain 8. Tinan hirak liu ba forma uma kain, moris haksolok ho ninia isin sorin Cidalia Lopes Nobre Mouzinho Guterres. Agora iha ona aifuan domin nain 4 mak hanesan, Fransisco Cidalino Guterres, Eldino Nobre Guterres, Felezito Samora Guterres no Dalia Guterres.

                                                   ***

Fransisco Guterres Lu Olo hahu ninia estudu ba eskola primaria iha tinan 1963 iha Colegio Santa Terezinha Ossu, remata tinan 1969. Depois kontinua ba Liceu Dili, remata tinan 1973. Bainhira remata husi Liceu Dili, Lú Olo sai professor iha Escola Santa Teresinha, Collegio Santa Terezinha Ossu.

Iha tinan 1974, Lu Olo kontinua estudu ba universidade, maibe la konsege kontinua tanba situasaun politika rai laran momentu neeba la permite ona. Nia foti desizaun hamutuk ho FRETILIN hodi luta ba ukun rasik an. Tama faze ukun an, iha tinan 2005 kontinua fali ninia estudu ba Fakuldade Direitu UNTL, remata tinan 2012. 

Lú Olo konese nuudar lider nasional no luta nain diak ida dezde tinan 1974 no durante 24 anus kontinua funu iha ai-laran. Funu hasoru okupasaun Indonezia. Ninia istoria rezistensia hahu kedas tinan 1974. Momentu neeba Lú Olo sai militánsia Partidu FRETILIN dezde tinan 1974. Nia fo ninia an tomak ba luta libertasaun nasional to’o manan ukun an.

Iha tinan 1974, Lú Olo adere ba ASDT, tanba nia haree partidu ida nee, nia defeza mak independensia total ba Timor-Leste, iha vizaun klaru konaba mudansa ba vida sosial, ekonomika no polítika povu maubere nian, liu husi reforma estruturais neebe mosu iha tempu kolonializmu Portugues. Nee mak dalan atu liberta patria no liberta povu.

Iha situasaun revolusaun momentu neeba, Lú Olo hetan mos orientasaun makaas husi padre Salesiano (SDB) sira. Balu hanorin nia konaba konsiensia no moralidade luta ba povu maubere – buibere no patria maubere – buibere.

Iha tinan 1975, bainhira ASDT muda ba FRETILIN, Lú Olo adere an kedas ba FRETILIN nuudar militante ida. Nia hamutuk ho FRETILIN hatuur independensia ba patria no povu maubere – buibere. I bainhira forsa Indonezia (TNI) invade Timor-Leste iha loron 7 fulan Dezembru tinan 1975 hamutuk ho forsa FALINTIL evakua ba foho, hela iha ai-laran hamutuk ho povu no lideransa Comite Central FRETILIN (CCF).

Iha forsa armada (FALINTIL), Lú Olo tama iha pelutaun ida neebe komanda husi Komandante Lino Olkasa. Iha fulan Junu tinan 1976, Lú Olo hetan nomeasaun nuudar Vise Sekretáriu area Ossu nian, Munisipiu Viqueque. Iha tinan hanesan, Lu Olo substitui fali sekretariu zona. Depois, hetan kapturasaun husi forsa TNI.

Iha reuniaun dahuluk CCF tinan 1976, Lú Olo hetan nomeasaun sai nuudar Vise Sekretariu Regiaun Leste. Ho kargu nee, Lu Olo hahu iha ligasaun direta ho Komando da Luta.

Iha tinan 1977/78, Lu Olo hetan nomeasaun nuudar Komisariu Sektor Ponta-Leste iha tinan 1978 atu remata, inimigu (forsa TNI) konsege harahun baze de apoiu no hahu kontrola makaas los ba populasaun. Tinan tolu tuir inimigu harahun baze de apoiu, hamosu tempu susár tebes ba sira neebe sei iha foho. Situasaun nee obriga faze foun ida ba funu gerrilla nian. Lú Olo hili halao funu gerrilla atu kumpre no iha obrigasaun liberta patria no liberta povu Maubere ho barani. Mate ka moris, ukun rasik-an.

                                                       ***

Iha tinan 1981, rezistensia armada FRETILIN (FALINTIL) hahu re-estruturasaun iha foho husi lider sira neebe to’o agora balu sei moris hela, hanesan Kay Rala Xanana Gusmão, Komandante Ma-Hunu no Komandante Basuka neebe tuir mai mate iha kombate.

Iha tinan 1982, Lú Olo hetan nomeasaun nuudar Adjuntu iha Regiaun Leste, nomos halo parte ba Komando Terseira Kompania Gerrilla nian. Nia asumi knaar nuudar responsavel polítiku.

Iha tinan 1984, Lú Olo hetan nomeasaun nuudar Komisariu Polítiku iha tinan 1987, nia halao knaar nee hamutuk ho funsaun ezekutivu bainhira nia hetan transferensia ba Regiaun Kruzeirus neebe kompostu husi Munisipiu Manufahi, Manatuto Oeste, Aileu no parte Oriental Díli.

Iha tinan 1987, Komandante Xefe da Luta, Kay Rala Xanana Gusmão hasai-an husi FRETILIN depois harii Conselho Nacional Resistência Maubere(CNRM). CNRM nee nuudar estrategia foun ba luta. Komando polítiku FRETILIN nian integra ba Comissão Directiva Fretilin (CDF) neebe parte integrante ba Rezisténsia Armada, neebe momentu neeba, Ma-Hunu mak sekretariu, no Mau-Hudo, Conis Santana no Lú Olo mak Vise Sekretárius.

Bainhira Mau-Hudo hetan kapturasaun husi TNI iha tinan 1991, no tuir mai Kay Rala Xanana Gusmao iha tinan 1992, no Ma-Hunu entrega an iha tinan 1993. Conis Santana mak sai Sekretariu CDF nomos Komando da Luta, no Lú Olo asumi kargu nuudar Vise Sekretáriu CDF.

Bainhira Komandante Conis Santana mate iha tinan 1998, Lú Olo asumi kargu nuudar Sekretariu CDF no kaer funsaun politiku iha rezistensia armada.

Tuir Lú Olo nia proposta, FRETILIN realiza konferensia extra-ordinaria iha Sydney, Australia, hodi reorganiza Diresaun Sentral FRETILIN nian. Nunee Konsellu Prezidensiál FRETILIN nian harii no substitui CDF, i Lú Olo sai nuudar Koordenador Jeral Konsellu Prezidensiál FRETILIN ba rezistensia armada, no Mari Alkatiri nuudar Primeiru Vise Koordenador iha Frente Diplomatika, Ma-Hunu nuudar Segundu Vise Koordenador iha Frente Klandestina no Mau-Hudo nuudar Sekretáriu Sekretariadu Polítiku Permanente FRETILIN nian iha Frente Klandestina.

Banihira CNRT harii, Lú Olo mos sai membru Conselho Político Nacional CNRT (CPN/CNRT), Secretario Frente Política Interna (FPI), membru Conselho Político Militar iha rezisténcia armada, no Koordenador Jerál Konsellu Prezidensiál FRETILIN.

                                                        ***

Tama faze ukun an iha loron 26 fulan Novembru tinan 2000, Lú Olo entrega ninia kilat M-15 ho munisoins tomák ba Komando FALINTIL. Depois nia fila ba Díli hodi halao Konferénsia Nasional Kuadrus FRETILIN hodi re-organiza estrutura baze FRETILIN neebe rahun iha funu laran, nomos prepara Kongresu Nasional Partidu FRETILIN iha tinan 2001.

Antes nee, iha tempu okupasaun Indonezia, Lu Olo eleitu nuudar Prezidente FFRETILIN periodu 1998 – 1999. Tama periodu ukun an, tinan 2006 – 2017 sai nuudar Prezidente Parlamentu Nasional periodu 2002 – 2007.

Kongresu FRETILIN tinan 2001, eleje Lú Olo nuudar Prezidente CCF, hanesan mos iha kongresu FRETILIN ba daruak iha tinan 2006. Iha eleisaun lejizlativa loron 30 fulan Agostu tinan 2001, Lú Olo lidera Partidu FRETILIN ba vitória boot. Manan asentu barak liu hodi kompõe Assembleia Konstituinte.

Iha horas 00:00, loron 20 fulan Maiu tinan 2002 nuudar Prezidente Parlamentu Nasional, Lú Olo mak halo Declaração Restauração Independência RDTL no fó tomada de posse ba Kay Rala Xanana Gusmão nuudar Prezidente da República. I Lú-Olo mak Declarador Restauração Independência RDTL.

Iha fulan Abril tinan 2007, Lú Olo kandidatu ba Prezidente Repúblika no manan votus boot liu kandidatu sira seluk iha primeira ronda, maibe lakon iha segundu ronda.

Iha tinan 2012, Lú Olo kandidata an nafatin ba Prezidente Republika, maibe lakonsege manan, hanesan ho akontesimentu tinan 2007. Maibe, tanba ho vontade no prinsípius dezde 1974/75, afirma an nuudar ema ida neebe hakarak luta ba libertasaun pátria no povu maubere. Iha tinan 2017, Lú Olo kandidata an fila fali no manan iha primeira ronda hodi servi povu Maubere, eleitu nuudar Xefe Estadu períodu 2017-2022.

Tinan oin, povu Timor Leste sei halao eleisaun prezidensial (elprez) hodi hili kandidatu neebe merese atu hili no serve sai Prezidente Republika. Iha elprez tinan oin 2022, Lu Olo sei nafatin kandidata an ba Prezidente Republika periodu 2022-2027.

Nia kandidata an nafatin, tanba vontade no prinsípius hakarak servi no kontinua luta ba libertasaun pátria no povu maubere. Lú Olo prontu kandidata an dala ida tan hodi hametin Estadu Direitu Demokratiku no luta ba bein-star povu maubere, hanesan ninia prinsípiu sira neebe nia ka’er dezde tinan 1974/75. Nia prontu fó an tomák hodi liberta pátria no povu maubere.

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 23 Setembru: Kazu Pozitivu 58, Rekuperadu 148 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu pozitivu iha ema nain 58, i kazu rekuperadu ohin loron 148 no obitu nain...

Vasinasaun Dalan Seguru, Normaliza Situasaun

DILI, STLNEWS.co – Vasinasaun mak dalan seguru hodi normaliza situasaun, no hasae imunidade forte atu prevene Covid-19. Kestaun nee haktuir husi Ministru Ensinu Superior Siensia...

Finalista ICS 292 Simu Graduasaun

DILI, STLNEWS.co – Institutu Ciencia Saude (ICS), ohin halao graduasaun ba finalista hamutuk 292, kompostu husi fakuldade 4 mak hanesan, Fakuldade Enfarmajen, Farmasia, Parteira...
%d bloggers like this: