SANTA TERESA DE ÁVILA, VIRGEM E DOUTORA DA IGREJA

STLNEWS.co – Teresa Sanchez de Cepeda y Ahumada moris iha Gotarrendura, besik Ávila (Espanha), iha loron 29 Marsu 1515. Aman naran Afonso Sanchez de Cepeda no inan naran Beatriz Dávila Ahumada. Sei kiik, nia lee ona Santu sira nia vida hamutuk ho nia maun Rodrigo (tinan 12). Nia hakarak sai mártir, ne’e duni ho Rodrigo, sai hosi sidade atu ba África atu nune’e mouros sira bele tesi nia ulun. Maibé, iha dalan sira nio ida rekonese labarik na’in rua, no lori sira fila ba uma. Teresa mos lee livro kona ba Cavalaria, liu liu, livru ida naran Amadis de Gaula.

Teresa nia ina mate iha 1529, wainhira nia ihatinha 14. Ikus mai, ho otas 17, nia tama konventu freiras Agostinhas de Nossa Senhora da Graça. Liu tiha fulan balu nia tama fali konventu Encarnação, iha Ávila. Nia helakoventu ne’e iha tinan 27 laran. Nia mos esperimenta terus barak, iha tinan sanulu resin rua nia laraan. Maibé loron ida, iha orasaun hetan fali konsolasaun no ksolok. Iha konventu Encarnação freira sira la dun moris vida religiosa lolós. Ema barak tma konventu atu koalia…Teresa moris tuir deit. Maibé, loron ida, iha Oratorio, nia hateke ba Na’i Jezus nia kruz.

Teresa hateke ba Jezus nia oan no tanis. Hahú momento ne’ebá, Teresa hanoi atu moris lolós tuir regra. Teresa mos hetan konsellu hosi ema matenek hanesan Saun Francisco de Borja, padre Pedro Alcãntara. Ho otas 40, nia saran aan tomak ba Maromak. Wainhira iha ona tina 45, nia harii konvetu reformado ida iha Ávila.Ho lisensa Prior Geral da Ordem das Carmelitas, Madre Teresa halo fundasaun iha rai barak: Medina de Campo, Malagón, Toledo, Pastrana, Salamanca, Alba, Segovia, Sevilla, Palencia, Soria no Burgos. Hamutuk ho São João da Cruz, Teresa halo reforma ba orden Carmelita, hodi hamosu “Ordem de Carmelitas Descalços” (OCD). Teresa mos harri konventu ba ema mane, iha Duruelo, tinan 1568.Maiske halo viajen barak, Teresa mos sai escritora.

Nia hakerek Vida, O Caminho de Perfeição, Constituições da Reforma, Castelo Interior. Nia ema mística ida. Iha loron 4 fulan Outubru 1582, nia mate iha rai naran Alba de Tormes.Tanba iha tinan ne’ebá Kalendariu troka, (kalendariu gregoriano) loron haat Outubru tinan ne’ebá muda ba loron 15 fulan Outubru. Ne’e tuir kalendáriu foun, Santa Teresa mate iha loron 15 fulan Outubro ho otas (idade) 67. Iha tinan 1622 Amu Papa Gregório XV foti sai santa. No iha loron 27 Setembru 1970, amu Papa Paulo VI, deklara Santa Teresa de Ávila, Doutora da Igreja.

Lisboa, 12 de outubro de 2020
Dom Carlos Filipe Ximenes Belo

LEAVE A REPLY

Please enter your comment!
Please enter your name here