SANTOS ARCANJOS MIGUEL GABRIEL E RAFAEL

Dom Carlos Filipe Ximenes Belo (Photo: STL News)

STLNEWS.co – Iha loron 29 fulan Setembru, Santa Kreda selebra festa Arkanju na’in tolu iha misa ida deit. Kona ba Anju no Arkanju sira naran, Bíblia hatudu deit naran tolu ne’e: Miguel, Gabriel, Rafael.

1.- São Miguel. Sagrada Escritura hatudu nia hanesan Príncipe milísia ka ‘tropa’ lalehan nian, no defensór glória Maromak nian. Ita lee (sani) iha Livru Apocalipse: “Iha lalehan iha funu ida. Miguel ho ninia anju sira funu hasoru Dragaun (Samean boot). Dragaun funu ho nia anju sira, maibé, sira lakon, nune’e iha laehan, la iha tan fatin ba sira” (Apc. 12, 7-8).

Uma-kreda mak Israel foun, Na’i Maromak nia emar (povu). Miguel ninia knar mak defende povu ne’e hsoru ninia inimigu sira hosi liur no hosi laran. Iha nia tempu, amu Papa Leão XIII haruka reza orasaun Saun Miguel nian, molok missa remata, atu nune’e Saun Miguel fó protesaun mai ita, atu hasoru Satanás no espíritu aat sira.

2. – São Gabriel, nia mak anju Enkarnasaun nian. Dehan katak wahira Na’i Maromak iha planu atu soi mundu no haruka nia Oan Mane Mesak halo-aan ba Mane, Maromak haruka Anju Gabriel fó hatene ba Na’i Feto, Lia kmanek ida ne’e. “O sei Ko’us”…Iha Evenjellu Saun Lucas, ita sani tan : “Há’u Gabriel: há’u assiste iha Maromak nia Oin; no há’u mai atu fo hatene lia foun kmanek ida ne’e ba Ó” (Lc 1,19). Anju Gabriel mos mosu ba Zakarias, atu fó hatene katak nia kaben Isabel sei sai Precursor nia inan, maske nia ferik ona.Bainhira ita reza Avé Maria, ita sei hanoin Arkanju Gabriel.

3. – São Rafael. Anju ne’ébé halo diak, no akompaña foin sa’e Tobias, wain hira nia halo viajen hosi Ninive ba Média. Anju Rafael defende Tobias hosi susar oin oin no tulun iha kazamentu ho Sara (Tob 5-12). Arkanju Rafael mak fó fali matan diak ba katuas Tobias. Ba Tobias, Rafael dehan: “Bainhira o harohan ho tanis, i o hakoi ema mate sira, há’u mak lori o nia hamulak ba Na’i Maromak. Oras ne’e, Na’i haruka atu halo o haree fali. Há’u Anju Rafael, iha anju na’i hit unia let, ne’ebé assiste iha Maromak futar oin” (Tob 5-12).

Saun Rafael padroeiru ba enfermeiru no doutor sira. Ema foin sa’e sira, ne’ebe namora, ka iha noivadu, sira husu tulun ba Saun Rafael atu hetan ksolok no felisidade.
Lisboa, 27 de setembro de 2020
Dom Carlos Filipe Ximenes Belo

LEAVE A REPLY

Please enter your comment!
Please enter your name here