Saun Kosme no Saun Damiaun, Mártir (26 de Setembro)

Dom Carlos Filipe Ximenes Belo (Photo: STL News)

São Cosme e São Damião

STLNEWS.co – Tradisaun haktuir katak santu rua ne’e maun no alin, no balu dehan sira nain rua kaduak. Tradisaun mos dehan katak Saun Kosme no Damiaun sira doutor (médico) ne’ebé halo konsulta no kura ema ho grátis d’eit. Ema hosi Grécia (Gregu) bolu sira na’in rua ANARGIROS, dehan katak osan laek ou la iha osan, tan ba halo sira nia profisaun (medisina) la kobra osan, ho karidade, liu liu ba ema kiak sira. Santu na’in rua ne’e mate wainhira imperadór Diocleciano (284-305), halo perseguisaun hasoru ema ne’ebé fiar iha Jezus Kristu.

Molok ema oho sira, juiz Lísias, wainhira halo julgamentu iha tribunal, husu sira na’in rua, iha knua Egeia de Cilicia, iha Ásia Menor.

Lisias fó orden nune’e: – Lori mai iha ne’e, ema ne’ebé tuir relijiaun aat sarani sira nian.
Eskrivaun sira hatan: – Ita boot sei hetan sira iha tribunal.

  • Lisias dehan: Hateten mai, imi nia naran, imi nia kondisaun, imi nia relijiaun, no imi nia pátria.
  • Kosme ho Damiaun hatan: “Ami hosi sidade ida iha Arábia.
  • Imi naran sá?
  • Há’u naran Kosme, há’u nia alin naran Damiaun. Ami hosi uma-kain dato sira nian, no ami nia profisaun doutór/médico.
    Lisias husu teni: – Imi nia relijiaun?
  • Ami nia relijiuan Kristaun.
  • Diak, imi hewai no nega tiha imi nia Maromak ba, no hakruuk hodi adora maromak sira império nian.
    Kosme há Damiaun hatan: – o nia maromak falsu, i o la bele fó ema nia naran ba sira, tan ba maromak bar-barak ne’e, diabu sira nian.
    Lisias, hirus teb-tebes, dehan: – Kesi metin sira nia liman no ain, fó kastigu boot ba sira, to’o sira adora império nia maromak.
    Ema aat sira hahú baku maun alin nai rua ne’e to’o dólar didiak, to’o kanek. Maske nune’e, Kosme ho Damiaun dehan ba juiz.
  • Prezidente, bele kastiga ami, makaas liu tan; tan ba ami la sente moras.
  • Entaun, Juiz haruka ema taa no tesi tiha sira nia ulun to’o mate.

Ikus mai, sarani lori Saun Kosme no Damiaun nia isin haleu knua sira ho devosaun boot. Iha tempu ne’e ema ne’ebé moras no kanek, sira hetan fali isin diak, tan ba milagre ne’ebé Kosme ho Damian halo. Iha sékulu IV, sira nia kultu hahú iha Constantinopla. Iha Roma, Amu Papa Símaco (498-514) harii oratório ida iha foho Esquilino atu fó onra ba mártir na’in rua ne’e. Amu Papa Félix (526-536) dedika bazílika rua ba santu mártir maun alin Kosme no Damian. Ikus mai Santa Kreda iha liturjia, hatama Saun Kosme ho Saun Damiaun sira nia naran tama iha Cânone Romano, ka iha Missa/Eucaristia I.

Lisboa, 23 de setembro de 2020
Dom Carlos Filipe Ximenes Belo

LEAVE A REPLY

Please enter your comment!
Please enter your name here