Tinan 40 Liu Ona ex-Paviliaun Provinsia Timor Timur, Oinsa Agora?

Paviliaun Timor Timur, neebe konstrui ho modelu husi Lospalos, Uma Lautem iha Taman Mini Indonesia Indah (TMII), Leste Jakarta. (Foto: STL/António César)

JAKARTA, STLNEWS.co – Timor Leste agora nuudar nasaun independente, maibe istoria hakerek Timor Leste nuudar parte Indonezia nian, hanesan XXVII provinsia.

Legadu istoria nian ida mak paviliaun provinsia Timor Timur iha Taman Mini Indonesia Indah (TMII), Leste Jakarta (Jakarta Timur), neebe konstrui iha tinan 1979 no segundu Prezidente Indonezia, Soeharto, inagura iha 20 Abril 1980.

Foto: STL/António César

Paviliaun Timor Timur nee konstrui ho modelu husi Lospalos, Uma Lautem. Iha Uma Lautem nee nia laran iha espozisaun sasan artes tradisionais Timor Leste, hanesan Tais, surik, instrumentus muzikais, fotografias paizajen Timor Leste, variedades sipu husi Atauro, ho seluk-seluk tan. Timor Leste independete tiha iha loron 20 fulan Maiu 2002, management husi TMII deside troka estatutu sai hanesan museu too agora.

Foto: STL/António César

Tuir observasaun ekipa STL iha Domingu (14/03/2021), ema barak mai vizita no hasai foto iha Uma Lautem nee nia oin. Entrada ba Museu Timor Timur nee, selu Rp 5.000 ou hanesan 50 Cent. Museu loke tuku 9 dader (11:00 OTL) no taka tuku 4 lorokraik (18:00 OTL).

Foto: STL/António César

Bainhira ekipa STL ba vizita Museu Timor Timur nee, ema sei halo hela renovasaun maibe paradu hela tanba pandemia Covid-19. Kondisaun iha Uma Lautem nee nia laran nakukun, laiha eletrisidade, rairahun, seramika rai nakloke hela, Tais balu tuan no naklees ona.

“Tuir loloos paviliaun nee renova hela, maibe paradu desde Covid-19. Lahatene loos bainhira mak kontinua fali, maibe sei halao fali nia renovasaun.” hatete staff museu neebe akompania ekipa STL iha vizita nee.

Museu Timor Timur uluk hanesan paviliaun provinsia Timor Timur, simu vizita barak husi xefe estadus estranjeirus, entre seluk Primeiru Ministru India, Naelam Sanjiva Reddy ho kaben, iha loron 4 fulan Dezembru 1980.*

Reportajen: António César
Editor: António César

LEAVE A REPLY

Please enter your comment!
Please enter your name here