JAKARTA, STLNEWS.co – Ministra Negosiu Estranjeiru no Kooperasaun (MNEK), Adaljiza Magno, akompanha Prezidente Republika (PR), José Ramos Horta, iha vizita ofisial ba Sekretariadu Association of Southeast Asian Nations (ASEAN) neebe simu direta husi Sekretariu Jeral ASEAN, Dato Lim Jock Hoi.
Iha sorumutu ho Sekretariu Jeral ASEAN nee, Prezidente Republika Ramos Horta koalia mos konaba integrasaun ekonomika Timor-Leste (TL) nian no potensial investimentu iha TL, no mos TL nia prosesu adezaun ba Organizasaun Komersiu Mundial (OMK). Sorumutu nee rasik halao iha Sekretariadu ASEAN Jakarta, Indonezia, Kuarta nee (20/7/2022).
Prezidente DR. José Ramos Horta aprezenta mos prosesu dezenvolvimentu neebe daudaun nee lao hela iha Timor-Leste, no kooperasaun neebe TL estabelese ho pais avansadu sira, hanesan Estadus Unidus Amerika, Japaun, Korea Sul no Xina.
Durante reuniaun parte rua koalia konaba Timor-Leste nia prosesu adezaun ba ASEAN, partikularmente Fact Finding Mission ba pilar prinsipal tolu, hanesan Komunidade Politika-Seguransa ASEAN, Komunidade Ekonomika ASEAN no Komunidade Sósiu-Kulturál ASEAN).
Sekretariadu ASEAN hatoo mos katak, daudaun nee delegasaun ASEAN nian kompostu husi ofisial estadu membru sira husi Socio Cultural Community (SOCA), orgaun setorial ASEAN Social Cultural Community (ASCC), Misaun Permanente Estadu membru sira ba ASEAN, no Sekretariadu ASEAN halao hela avaliasaun ba pilar Komunidade Sosiu Kultural no kontinua ho pilar Komunidade Ekonomika ASEAN. Adisiona tan katak, tanba Covid-19, ASEAN halao ona FFM virtual ida hamutuk ho pilar rua seluk.
(cri)
