STLNEWS.co – Politikus senior partidu Organisasi Nasional Melayu Bersatu (UMNO), Ismail Sabri Yaakob, sei simu tomada de pose sai Primeiru Ministru Malazia iha loron nee, Sabadu (21/08/2021), sei troka Muhyiddin Yassin neebe rezigna an ona.
Tuir reporter Reuters, liurai Malazia, Liurai Agong Sultan Abdullah, sei fo tomada de pose ba Ismail neebe ho tinan 61, iha tuku 14:30 horas Malazia nian.
Sultan Abdullah depois promote Ismail, hatete katak, governasaun tuir mai, haree liu ba atendimentu konaba pandemia Covid-19.
“Liurai hatete, ho Primeiru Ministru mak governu bele kontinua esforsu an hodi atende pandemia Covid-19 iha rai laran, hodi fo seguransa ba povu no nasaun ida nee, neebe hamosu ona krize ba iha ita nia rain,” nee mak esteitmentu husi Palasiu Liurai Malazia nian iha Malazia.
Ismail promote husi Sultan Abdullah hanesan Primeiru Ministru, hafoin hetan apoiu husi 114 membru, hamutuk husi 222 membru parlamentu Malazia nian.
Desizaun nee foti husi Sultan Abdullah depois politika Malazia ladun lao diak iha semana kotuk, tanba UMNO dada nia apoiu husi governasaun Muhyiddin. Kestaun nee halo Muhyiddin no membru gabinete hotu rezigna an iha loron 16 fulan Agostu depois assumi kargu durante fulan 17.
Governasaun Muhyiddin halo povu hirus no la satisfas kauza husi kazu infeksaun Covid-19 neebe la kontroladu no aumenta ba bebeik. Aleinde nee populasaun Malazia reklama estatutu emerjensia nasional no implementa serka sanitaria (lockdown), neebe halo sira difisil hetan rendimentu ba nesesidade lor – loron nian.
Fontes: CNN Indonesia
Editor: Xisto Mendonca da Costa
