POLRI Kaptura Sindikatu Exporta Kareta no Motor Ba Timor Leste

KAPTURA - Polisia Republika Indonezia iha Jawa Leste, kaptura sidadaun Indonezia nain 5 neebe halo asaun malversasaun kareta no motor iha Surabaya, Kuarta (10/02/2021). [Foto: Espesial]

SURABAYA, STLNEWS.co – Polisia Republika Indonezia (POLRI) Jawa Leste (Jawa Timur), Kuarta (10/02/2021) kaptura sidadaun Indonezia nain lima (5) neebe diskonfia halo aksaun sindikatu malversasaun kareta no motor hodi exporta ba Timor Leste.

Sidadaun Indonezia nain 5 neebe sai arguidu iha kazu malversasaun kareta no motor nee ho inisial mak hanesan DI, M, no PA hosi Surabaya, AP hosi Sidoarjo, no SH hosi Jombang.

Porta voz POLRI Jawa Lest, Komisariu Gatot Refli Handoko hateten arguidu nain 5 sosa kareta no motor ho dokumentu la kompleta iha leasing.

“Ida nee kazu negosiasaun kareta no motor neebe sira naok atu exporta ba estranjeiru,” dehan Gatot iha Kuartel Jeral POLRI Jawa Leste, Kuarta (10/02/2021).

Tuir Gatot, kareta sira nee laos deit sira sosa husi leasing, maibe kareta balun diskonfia sira naok iha teritoriu Jawa Leste. “Kareta ho motor balun diskonfia sira naok iha teritoriu Jawa Leste, depois sira exporta ba estranjeiru,” dehan nia.

Iha fatin hanesan Ditreskrimum (Direktorat Reserse Kriminal Umum) POLRI Jawa Leste, AKBP Nasrun Pasaribu hateten, asaun kriminalidade nee halao ona durante tinan hat nia laran. Iha asaun kriminalidade nee sira fahe funsaun no ida-idak halao sira nia funsaun.

DI no M halao funsaun pinta kareta, AP no SH nuudar joki inklui buka unit kareta, no PA halao knar halo dokumentu exporta sasan nian. “Depois hetan stok barak, sira rai sasan sira nee iha area armajen sasan iha rua Greges, Margomulyo Surabaya,” katak Nasrun.

Depois, sasan sira nee sira haruka liu hosi ekspedisi estranjeiru liu hosi tasi. Bainhira to’o iha Timor Leste, sasan sira nee entrega ba agente iha Timor Leste ho inisial A no G.

Tuir Nasrun, fulan ida nia laran sira haruka kareta no motor dala rua ou tolu tuir nesesidade agente ka redi neebe iha Timor Leste. Bainhira sasan nee to’o iha Timor Leste, A no G trata kedas dokumentu.

“Hosi Indonezia, kareta ho motor iha deit dokumentu STNK (Surat Tanda Nomor Kendaraan), depois iha Timor Leste halo fali dokumentu foun ka dokumentu Timor Leste nian,” dehan nia.

Liu hosi investigasaun, arguidu sira hetan millaun Rp 50 (Rp 50.000.000) kada fulan no maizumenus sira haruka ona kareta no motor atus ba atus ba Timor Leste.

Bainhira kaptura arguidu sira nee, polisia hetan 76 motor ho marka oi-oin, kareta pick-up 7 ho marka oi-oin, 3 dump truck, 5 smartphone, 2 laptop, no 25 kontainer.

Hosi asaun malversaun nee, arguido sira kontra lei ho artigu 481 KUHP Sub Pasal 480 KUHP Juncto 55 KUHP ho ameasa kadeia maximu tinan 7.*

Reportajen: Mikael Mali Mau

Editor: Ekipa STL

LEAVE A REPLY

Please enter your comment!
Please enter your name here