Asaltu Malu, PNTL Detein Suspeitu

Porta voz Komandu Jeral PNTL, Superintendente Xefe Arnaldo Araujo. (Photo: STL NEWS/Donaciano Magalhães)

DILI, STLNEWS.co – Asaltu malu neebe rezulta ema nain 5 kanek no uma lima hetan estragus, iha Suku Tirilolo, Postu Administrativu Baucau Vila, Munisipiu Baucau, Polisia Nasional Timor Leste (PNTL), detein ona suspeitu nain 3 ba sela.

Porta voz Komandu Jeral PNTL, Superintendente Xefe Arnaldo Araujo, hatoo kestaun nee ba jornalista sira, liu husi konferensia imprensa, iha nia knaar fatin, Komandu Jeral Caicoli, Dili, Kuarta (09/09/2020).

Nia dehan, situasaun jeral iha teritoriu Timor laran tomak durante 24 oras nia laran lao hakmatek, maibe iha problema balun, neebe akontese iha Munisipiu sira hanesan asaltu malu iha Suku Tirilolo, Postu Administrativu Baucau Vila, Munisipiu Baucau.

“Relasiona ho akontesimentu nee rezulta ema nain 5 sai vitima, detein suspeitu nain 3 no agora dadaun detein hela iha Polisia Munisipiu Baucau, inklui uma 5 hetan estragus,” dehan nia.

Arnaldo hatutan, enkuantu estragus ba komunidade sira nia uma hanesan janela, odamatan ho motivu, tanba sira lanu. “Autor sira oras nee dadaun Polisia Munisipiu Baucau, detein hela sira nain 3,” dehan nia.

Nia hatutan enkuantu iha semana nee nia laran mos asaltu malu iha Dili, parte CCD nian oin, joven nain rua baku malu no oras nee dadaun hetan ona presaun husi Polisia no ninia prosesu iha hela Munisipiu Dili.

Enkuantu iha asaltu malu seluk mos akontese entre grupu arte marsiais hanesan Persaudaran Setia Hati Terate (PSHT), ho Kmanek Oan Rai Klaran (Korka), neebe mak akontese iha Lisapat Munisipiu Eremera Subdistritu Hatulia.

“Agora dadaun mos suspeitu sira nee polisia Munisipiu Ermera halo ona kapturasaun ba sira no prosesu iha hela polisia nia liman,” hakotu nia.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here