Buti Fen Nia Kakorok, Laen Hatan Iha Tribunal

Lezada ho inisial AG (Fen), deside fahe malu ho arguidu inisial DX (Laen), tanba ninia laen baku nia. (Foto Ilustrasaun: Espesial)

DILI, STLNEWS.co – Arguidu ho inisial NL tenke hatan iha tribunal, tanba halo agresaun ka buti nia fen ho inisial ND nia kakorok too moras.

Tuir faktus katak, iha loron 10 fulan Dezembru 2019, iha Aimutin kalan lezada telefone ba iha arguidu, atu sosa ai moruk hodi haruka ba nia aman neebe moras iha Baucau.

Depois arguidu too ba iha uma, tolok kedan lezada lori liman basa lezada, no buti iha lezada nia kakorok too moras. Konsekuensia husi arguidu nia hahalok nee, halo lezada sente moras, hodi ba hato keixa.

Tanba nee Ministeriu Publiku promove arguidu ba iha krime violensia domestika ho forma ofensa integridade fisika simples neebe previstu iha artigu 145 husi KP.

Iha sala julgamentu laran, arguidu deklara katak, faktus neebe iha loos hotu.

“Faktus neebe iha loos hotu kedan, hau baku duni lezada, maibe agora ami diak malu ona, hau mos promete sei la halo tan hahalok nee iha futuru, deklara arguidu iha sala julgamentu, Tersa (26/01/2021).

Tribunal hare katak, arguidu konfesa imparsial ba faktus, tanba nee tribunal prezinde tiha, atu la rona deklarasaun husi lezada.

Tanba nee, tribunal husu ba iha Ministeriu Publiku, atu tama ba iha alegasaun.

Liu husi alegasaun, Ministeriu Publiku husu ba tribunal kondena arguidu tuir sirkunstansia neebe iha.

Enkuantu husi parte defeza nian, husu tribunal atu aplika pena neebe kaman ba iha arguidu.

Rona tiha husi parte rua, tribunal adia ba loron 5 fulab Fevereru hodi rona leitura sentensa.

Audensia julgamentu nee, prezide husi juiz singular Afonso Carmona, Ministeriu Publiku reprezenta husi prokurador nain ida, arguidu hetan asistensia legal husi Defensor Publiku.*

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here