Deskonfia Hana Ema Iha Aimutin, JD Tama Prizaun Preventiva

Tribunal Distrital Dili iha loron Kinta (01/10/2020), liu husi despaisu ikus ba iha prosesu primera interogatoriu, aplika medida prizaun preventiva ba iha arguidu ho inisial JD. (Foto: STL/Terezinha de Deus)

DILI, STLNEWS.co – Tribunal Distrital Dili iha loron Kinta (01/10/2020), liu husi despaisu ikus ba iha prosesu primera interogatoriu, aplika medida prizaun preventiva ba iha arguidu ho inisial JD.

Iha prosesu primera interogatoriu nee, taka ba iha publiku maibe husi parte Ministeriu Publiku nian, promove arguidu ba iha krime tentativa homesidu.

Hafoin despaisu tuir defeza arguidu nian, la konkorda ho medida neebe tribunal aplika, no nia parte sei halo rekursu.

“Tribunal aplika prizaun preventiva, tanba hanoin katak arguidu iha liur bele kontinua nafatin krime nee deskonfia ba, no dala ruma nia bele ameasa no bele hanoin ida nee tribunal nian hanoin, maibe nudar defeza hanoin medida neebe adekuadu liu mak aprezentasaun periodika,” dehan Estaquio Guterres ba STL iha TDD, Kinta (01/10/2020).

Nia hatutan, defeza nia hanoin medida aprezentasaun periodika mak diak liu, tanba arguidu bele hela iha liur no polisia ka Ministeriu Publiku presiza atu halo investigasaun ruma, arguidu bele hasoru sira ida nee maka defeza nia pedidu ba iha tribunal, maibe tribunal hare medida neebe serve liu mak prizaun preventiva nee.

Hatan konaba aseita ho desizaun nee ka lae, nia parte esplika hanesan defeza la aseita tanba nee nia prazu durante loron sanulu resin lima nia laran, defeza sei halo rekursu ba iha prosesu ida nee.

Tuir kronolojia katak, arguidu ho nia kolega ida neebe agora dadaun iha prizaun preventiva nee, hana ema iha Aimutin, maibe tuir arguidu nia deklarasaun momentu nee nia la iha fatin, maibe arguidu iha prizaun nee maka deklara fali dehan sira nain rua hamutuk.

Nunee iha diferensa hanoin entre arguidu nain rua nee, tanba nee Ministeriu Publiku rekere mai iha tribunal atu aplika prizaun preventiva ba iha arguidu, atu nia labele iha liur hodi ameasa ema ruma no halakon evidensia.

Defeza nee esplika arguidu laos ema neebe kriminozu, tanba foin primera vez halo krime, no nia parte konsidera medida neebe adekuadu maka aprezentasaun periodika.

Ministeriu publiku promove arguidu ba iha krime tentativa homesidu, tanba nee defeza hanoin katak, presiza investiga klean maka bele aplika krime nee ba arguidu.

Prosesu primeiru interogatoriu nee prezide husi juiz tular Albertina Neves, Ministeriu Publiku reprezenta husi prokurador Alfeu Moreira, no arguidu hetan asistensia legal husi Defensor Publiku Eustaquio Guterres.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here