Deskonfia Laen Ho Feto Seluk, Fen Lori Savi Gaveta Hurlele

Arguida ho inisial NM hanesan fen, lori savi gaveta armari nian baku ka hurlele lezadu ho inisial J, tanba deit deskonfia ba feto seluk. (Foto Ilustrasaun: detik.com)

DILI, STLNEWS.co – Arguida ho inisial NM hanesan fen, lori savi gaveta armari nian baku ka hurlele lezadu ho inisial J, tanba deit deskonfia ba feto seluk.

Tuir faktus katak, arguidu no lezada hola malu iha tinan 2014, sira iha oan ida, no ekonomikamente arguida no lezadu depende ba malu.

Iha loron 28 Dezembru 2019, iha arguidu no lezada nia uma Surik Mas, arguida no lezadu diskuti malu, tanba arguida deskonfia lezadu iha relasaun ho feto seluk.

Momentu mosu diskusaun nee arguida aruma nia sasan atu ba Ermera, tanba ho emosaun arguida lori savi gaveta armari nian hodi baku tutuir malu iha lezadu nia oin, maibe lezadu lori liman sata netik tiha, no kona fali iha lezadu nia liman parte karuk.

Depois lezadu sai tiha ba liur, arguida mos sai tuir ba lori liman rakut iha lezadu nia oin no kakorok hodi rezulta kanek no ran sai no mos mean. Arguida mos lori bikan ida tuda lezadu, maibe lezadu hase an tiha no la kona lezadu.

Konsekuensia husi arguida nia hahalok nee halo lezadu sente moras, maibe laba halo tratamentu iha hospital ida.

Tanba nee ministeriu publiku, akuza arguida ba iha krime violensia domestika ho forma ofensa integridade fisika simples neebe previstu iha artigu 145 husi KP.

Hatan ba faktus nee arguida deklara katak, mosu problema nee, tanba deit arguida deskonfia lezadu ba feto seluk.

Arguida mos deklara tan katak, arguidu nervoju mos iha momentu neeba, tanba arguida serbisu selu tiha lezadu nia eskola, maibe lezadu atu graduasaun la fo hatene antes ba arguida.

Arguida mos arepende nia hahalok, promete sei la halo tan iha futuru. Lezadu haforsa tan akuzasaun katak, arguida halo duni hahalok nee, maibe nia perdua nafatin arguida. Lezadu mos deklara tan katak, momentu neeba laos arguida deit mak baku lezadu, maibe atu salva lezadu nia an, lezadu mos liman kona arguida.

Tanba nee lezadu dehan katak, momentu neeba sira rua baku malu.

Rona tiha deklarasaun husi arguida no lezadu nian, ministeriu publiku hare katak, momentu neeba arguida no lezadu baku malu, laos arguida deit mak baku lezadu.

Tanba nee ministeriu publiku husu ba iha tribunal atu halo alterasaun ba fali iha krime ofensa resiproka. Konaba ida nee defeza nada apor, tanba nee tribunal mos aseita ho ministeriu publiku hodi halo alterasaun ba krime nee.

Depois tribunal hare katak, krime nee nia natureza semi publiku, lei fo dalan atu bele dada fila, se lezadu aseita.

Tanba nee, iha tentativa konsiliasaun lezadu aseita dada fila krime nee, arguida mos aseita.

Ho nunee parte ministeriu publiku no defeza husu ba iha tribunal atu homologa ezistensia de keixa no absolve arguida.

Rona tiha husi parte rua, tribunal homologa arguida no absolve husi krime nee.

Hafoin remata julgamentu, arguida mos hamrik ba kaer liman ho lezadu.

Audensia julgamentu nee prezide husi juiz singular Evanjelinho Belo, ministeriu publiku reprezenta husi prokuradora Ivonia Guterres, arguidu hetan asistensia legal husi Defensor Publiku.*

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here