FA Tenta Taa EC Ho Katana

Foto Ilustrasaun: kabar24.bisnis.com

DILI, STLNEWS.co – Arguidu ho inisial FA tenke hatan iha Tribunal, tanba tenta lori katana atu taa lezadu ho inisial EC.

Tuir faktus katak, iha loron 22 fulan Novembru 2018 tuku 3:25 iha Maloa Ailok Laran, arguidu lori metru ba sukat rai hodi tau estaka neebe lezadu EC okupa desde iha tinan 1980.

Ho nunee lezadu ba hase, tanba arguidu faan rai estadu barak ona ba ema, maibe arguidu foti katana atu taa lezadu nia kakorok.

Ho nunee lezadu lori liman los kaer nia liman no lori liman karuk hodi hadau katana husi arguidu.

Bainhira lezadu hadau tiha katana, no lori ba entrega iha xefi aldeia no depois kontinua ba entrega iha polisia.

Konsekuensia husi asaun neebe arguidu halo, lezadu sente tauk tanba arguidu lori katana atu taa nia.

Arguidu hatene katak bainhira kaer katana atu taa ema nee krime, maibe arguidu halo nafatin.

Arguidu halo krime nee ho livre deliberada konsentementu no hatene katak hahalok nee lei bandu no kastigu tuir lei, maibe halo nafatin.

Tanba nee Ministeriu Publiku akuza arguidu hanesan koa autor material ba krime armas brankas husi numeru 5/2017.

Hatan ba akuzasaun nee arguidu deklara ba tribunal katak faktus sira nee balun los no laos.

Arguidu deklara katak, konaba dehan arguidu fan rai estadu barak, no arguidu lori katana atu taa lezadu nee lalos.

“Dehan hau fan rai nee laloos, no hau la lori katana taa nia, deklara arguidu iha sala julgamentu TDD, 14/01/2021.” tenik nia.

Arguidu deklara tan, iha momentu neeba arguidu lori duni katana atu tidin estaka iha baliza rai, maibe lezadu too mai silu arguidu nia liman ba kotuk no lori katana nee ba entrega iha xefe aldeia, xefe suku no polisia.

Lezadu deklara katak, faktus neebe konsta iha akuzasaun loos hotu.

Tribunal rona tiha husi parte rua, Tribunal husu ba iha ministeriu publiku atu submete ba iha alegasaun.

Liu husi alegasaun, Ministeriu Publiku solisita ba tribunal atu aplika pena neebe justu ba arguidu. Enkuantu husi parte defeza nian, husu tribunal atu absolve arguidu husi krime nee.

Rona tiha husi parte rua, tribunal deside adia julgamentu nee ba fali loron 27 Janeiru tuku 2:30 loraik hodi rona desizaun final.

Audensia julgamentu nee prezide husi juiz kolektivu, Ana Paula, Maria Solana, Ivan Suritai, Ministeriu publiku reprezenta husi prokurador Reinato Bere Nahak, arguidu hetan asistensia legal husi advogadu privadu.*

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here