Forsa Konjunta Kaptura Sidadaun 11

Sidadaun nain 11 neebe ekipa Konjunta Fronteira kaptura kompostu husi Timor oan nain 8, nomos estranjeiru nain 3. (Foto: STL/Efizenia da Costa)

DILI, STLNEWS.co – Semana hirak liu ba Komandu Jeral PNTL liu husi Ekipa Konjunta Fronteira, neebe kompostu husi Falintil Forsa Defesa Timor-Leste (F-FDTL) ho Compaina Operasaun Espesial, konsege kaptura tan sidadadun nain 11, tanba tama ilegal iha lina fronteira hodi halo negosiu.

Sidadaun nain 11 neebe ekipa Konjunta Fronteira kaptura kompostu husi Timor oan nain 8, nomos estranjeiru nain 3.

Tuir portavoz Komandu Jeral Polisia Nasional Timor-Leste (PNTL), Arnaldo Araujo katak, iha semana kotuk no iha semana nee nia laran, hahu husi dia loron 15 to 21, Forsa Konjunta neebe hamutuk ho FDTL, PNTL, COE, halao servisu iha lina fronteira, sira konsege kaptura tan ema nain 11 no estranjeiru nain 3, nomos sidadaun TL nain 8, neebe mak tama ilegalmente.

Agora dadaun submete hela sira ba iha karantina Batugade, hodi kumpri kriteira sira neebe mak iha, bainhira remata karantina sei submete nafatin sira ba iha prosesu investigasaun iha munsipiu Maliana nian.

“Ema nain 11 no nain 3 husi Indonezia no nain 8 husi Timor Leste, sira nee barak mak halo sira nia komersiu ilegal, oras nee dadaun iha hela karantina Batugade Maliana,” dehan nia ba jornalista sira, liu husi konferensia ba imprensa, iha salaun enkontru Komjer Caicoli Dili, Kuarta (23/09/2020).

Nia esplika, haree ba prosesu neebe mak agora dadauk lao nee, depois karantina hotu tiha sei submete sira ba iha prosesu investigasaun neebe mak Munisipiu Bobonaru sei halao, tanba sira neebe sei halao mak PNTL kaptura nee barak mak iha area munisipiu Bobonaro nian.

“Iha investigasaun mak bele deskobre lolos katak, sira nee involve iha arte marsial ka ou halo negosiu ilegal,” nia esplika.

Aleinde nee, portavoz nee mos informa ba ema balun neebe tama ilegal no latama iha karantina, tanba nee PNTL hetan informasaun nee automatikamente, PNTL sei ba lori ema nee atu hatama ba iha karantina.

“Ita haree iha semana hirak liu ba sira balun, neebe mak tama mai la liu husi dalan legal no to iha Dili, PNTL ba lori sira hodi intrega ba iha karantina,” dehan nia.

Tanba nee nia husu ba komunidade sira sei iha familia balun neebe husi rai liur tama mai iha rai ida nee, husu atu bele informa ba autoriedade polisia, autoriedade saude, tanba sira nee mak sempre tau matan ba ema sira nee.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here