GMPTL Kondena Aktu Krime Iha Batugede

Grupu das Mulheres Parlamentares de Timor- Leste (GMPTL), kondena makas aktu krime homesidiu neebe akontese iha Batugede. (Foto: Media PN)

DILI, STLNEWS.co Grupu das Mulheres Parlamentares de Timor- Leste (GMPTL), kondena makas aktu krime homesidiu neebe akontese iha Batugede.

Grupu das Mulheres Parlamentares de Timor- Leste (GMPTL), kondena makas aktu krime homesidiu no insentu neebe komete husi autor ho inisial DSP iha suku Batugede, Postu Administrativa Balibo, Munisipiu Bobonaro, iha loron 3 fulan Marsu tinan 2021,” dehan Prezidente GMPTL Deputada, Lidia Norberta liu husi konferensia imprensa, neebe halao iha PN, Dili, Sesta (05/03/2021).

Nia dehan, direitu ba vida konsagra ona iha Konstituisaun Republika Demokrstika Timor-Leste (K-RDTL), iha numeiru 1, artigu 29 katak, A Vida Humana é Inviolavel signifika, labele viola ema ida nia vida.

Aleinde nee iha K-RDTL konsagra mos iha numeiro 1, artigu 30 katak, ema hotu-hotu iha direitu ba liberdade, seguransa no integridade ba nia an rasik.

Nia afirma, iha loron Kinta-Feira, 4 Marsu 2021, iha oras tuku 10:00, GMPTL ba diretamente ba mortuariu HNGV hodi haree vitima mortal husi akontesimentu homisidiu iha Suku Batugade, Postu Administrativu Balibo, Munisipiu Bobonaro.

Kazu ida nee akontese hanesan sekuensia husi krime insestu neebe autor halo hasoru nia oan feto boot rasik, iha nia residensia iha fulan Dezembru tinan 2020.

Nia hatete, sasin ba aktu ida nee maka nia kaben rasik, neebe too ikus mai tenke lakon nia vida neebe hakotu husi autor (nuudar nia kaben).

Tuir informasaun neebe maka GMPTL rekolla relata katak, autor DSP submete ona ba prosesu investigasaun no detensaun tanba komete kazu insestu.

Rezultadu husi prosesu refere maka, aplika medidas koasaun TIR (Termu ba identidade no rezidensia), no konsekuensia husi aplikasaun medidas koasaun TIR maka, hodi rezulta vitima MFF mate iha loron 3 fulan Marsu tinan 2021.

“Autor DPS laos deit komete deit krime homesidiu maibe, antes komete ona aktus insetu hasoru nia oan feto boot, iha fulan Dezembru 2020, neebe maka rezulta aplikasaun medidas koasaun termu identidade no rezidensia,” tenik nia.*

Reportajen: Domingas Soares / Guilhermina Franco
Editora: Carme Ximenes

LEAVE A REPLY

Please enter your comment!
Please enter your name here