Hatama Sasan Ilegal, UPF Kaptura Sidadaun Timoroan Nain 5

Porta voz komando jeral PNTL, Superintendente Xefe Arnaldo Araujo. (Photo: STL News/Donaciano Magalhães)

DILI, STLNEWS.co – Komandu Jeral PNTL, liu husi Unidade Polisia Fronteira (UPF), kaptura sidadaun Timoroan nain 5, neebe tama ilegal iha lina fronteira, tanba hatama sasan ilegal hanesan kombustivel no tua.

Porta voz komando jeral PNTL, Superintendente Xefe Arnaldo Araujo, hatoo kestaun nee ba jornalista sira liu husi konferensia imprensa, neebe halao iha nia knaar fatin, Komandu Jeral Caicoli, Dili, Kuarta (09/09/2020).

“Ita hatene mos iha lina fronteira iha suku Leleufe, Munisipiu Oecusse, iha ema nain lima neebe mak hatama sasan ilegal hanesan kombustivel ho tua, tanba nee hetan ona kapturasaun husi polisia UPF no oras nee dadauk sira hetan ona prosesu iha Munisipiu Oecusse,” dehan nia.

Porta voz nee hatete, Unidade Polisia Fronteira (UPF) sira mos kaptura sidadaun sira, neebe mak atraveza ou pasa ilegalmente iha fronteira, no ema sira nee Polisia UPF intrega ona ba iha sentru Covid nian, hodi bele hatama iha karantina.

“Sidadaun nain hira nee UPF kaptura iha lina fronteira hanesan Oecusse, lina fronteira Maliana, no lina fronteira Suai. No hau hakarak hatete emjeral deit ema nain 5 mak UPF Kaptura,” dehan nia.

Nia hatutan, agora dadaun UPF sira kaptura ona sira, no oras nee dadauk mos UPF entrega ona sira ba iha Sentru COVID Nasional. No sidadaun sira nee ema Timoroan, sira neebe mak ba sosa sasan iha fronteira lori mai faan fali iha sira nia munisipiu, ida nee mak sempre akontese bebeik.*

Reportajen: Efizenia da Costa

Editora: Carme Ximenes

LEAVE A REPLY

Please enter your comment!
Please enter your name here