Inan-Aman Divorsiu, Oan Hela Ho Tiun Hetan Violensia

Foto Ilustrasaun.

DILI, STLNEWS.co — Tribunal Distrital Dili (TDD) halao julgamentu ba arguidu nain 2, neebe halo violensia hasoru lezada ROSGV ho idade tinan 9.

Tuir faktus katak, lezada ROSGV hanesan arguidu JTCG no arguida MRL nia subrina rasik, neebe hela ho sira.

Tanba lezada nia inan-aman iha problema divorsiu. Tanba nee, lezada nia aman hili dalan atu lezada hela ho tiun kiik nuudar lezada nia aman nia alin mane rasik.

Momentu neeba depois entrega lezada ba familia lezada nia aman ba servisu iha Inglatera.

Iha loron 9 Fulan Agostu 2019, oras tuku rua, laiha motivu ruma, lezada nia aman kiik, arguidu JTCG bolu lezada hodi baku, kuu iha liman kelen sorin sorin, foti paralon baku lezada husi parte kotuk laran.

Hafoin mai fali iha loron 4 Fulan Setembru 2019, oras lokraik arguidu nia kaben, bolu lezada baku derpenti ho kabidu.

Baku too kabidu aat iha liman, hafoin foti tan manggera, baku iha lezada nia liman no isin lolon. Lakleur arguidu JTCG fila husi servisu haree lezada tanis, arguidu baku tan lezada no basa dala 2 too ran sai husi lezada nia inus.
Konsekuensia husi hahalok nee halo lezada sente morasno tauk. Tanba trauma ho arguidu sira nia hahalok leizada ba hatoo keixa. Tanba nee Ministeriu Publiku (MP) akuza arguidu fen-laen ho krime maos tratos neebe konjuga ho lei violensia domestika.

Hatan ba faktus nee, arguidu nain rua deklara ba tribunal katak, sira baku lezada tanba lezada gosta naok vizinu sira nia telefone.

Baku duni lezada, maibe baku atu hanorin, laos kastigu. Baku tanba lezada foti ema nia sasan hanesan telefone depois lori ba eskola.

Maski nunee, iha tribunal arguidu nain rua arepende sira rua nian hahalok. Tanba nee hatoo sira nain rua nia arependementu, promete sei lahalo tan hahalok nee iha futuru. Arguidu nain rua mos husu deskulpa ba lezada no ba tribunal.

Bazeia ba deklarasaun argidu ho arguida, Tribunal halo konfirmasaun ba lezada. Husi konfirmasaun nee lezada deklara katak, laos baku tanba foti ema nia telfone, tanba lezada nunka naok ema nia telfone.

Arguidu sira baku hau lezada tanba arguidu sira nia oan ba halo rahun ema nia vidru, depois dun ba lezada ho nia alin.

Tuir, Lezada konfirma tan katak, durante hela hamutuk ho arguidu sira, arguidu sira konsola lezada atu labele hasoru lezada nia mae, kuandu hasoru sempre baku.

Rona tiha parte rua, tribunal husu ba iha MP atu tama ba iha alegasaun. Liu husi alegasaun Ministeriu Publiku solisita ba tribunal haree husi sirkunstansia hotu, hodi aplika pena multa ba arguidu nain rua.

Parte defeza antes tama ba pedidu medida ba pena, defeza husu tribunal atu halo altersaun juridiku krime maos tratos ba krime ofensas simples.

Kona-ba medida pena, defeza konkorda ho desizaun ministeriu publiku nia pedidu katak, husu mos medida pena multa.

Rona tiha husi parte rua, tribunal adia hikas julgamentu ba iha loron 05 fulan Novembru 2020, tuku 11:00 dader, hodi rona desizaun ikus.

Audiensia julgamentu nee prezindi husi juiz kolektivu, Afonso Carmona, Ersilia da Silva, no Albertina Neves, parte Ministeriu Publiku reprezenta husi prokurador nain ida, no arguidu hetan asistensia legal husi defensor publiku.*

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here