Indisus Seidauk Sufisiente; TDD Aplika AP Direktor Jeral TP

Iha loron Sabadu (23/01/2021) tribunal liu husi nia despaisu ikus ba iha prosesu primera interogatoriu, aplika medida aprezentasaun periodika ba iha arguidu nain haat, no Termo Indentidade Rezidensia ba iha arguidu nain neen. (Foto: Espesial)

DILI, STLNEWS.co – Iha loron Sabadu (23/01/2021) tribunal liu husi nia despaisu ikus ba iha prosesu primera interogatoriu, aplika medida aprezentasaun periodika ba iha arguidu nain haat, no Termo Indentidade Rezidensia ba iha arguidu nain neen.

Prosesu primera interogatoriu nee, hahu iha loron Kinta nee, no remata ka despaisu ikus husi tribunal iha loron Sabado nee.

Despaisu ikus husi tribunal, aplika medida aprezentasaun periodika ba iha arguidu nain haat, arguidu RM hanesan Direktor Jeral iha TP, arguidu MB, arguidu MB, no arguidu JGAB.

Arguidu nain neen neebe hetan medida Termo Indentidade Rezidensia hanesan, arguida MB, arguida EB, arguidu JTS xefi suku, arguidu AG xefi aldeia, arguidu PMA, no arguidu OT hanesan membru PNTL ida.

Depois despaisu husi tribunal, tuir defeza arguidu RM nian Cansio Freitas katak, nia kliente hetan aprezentasaun periodika, tanba indisus la forte.

“Despaisu neebe tribunal hasai, sei iha Prosesu primera interogatoriu koalia konaba medida ekuasaun, faktus hotu neebe neebe ministeriu publiku promove mai iha tribunal, tuir tribunal nia konviksaun katak, indisus seidauk sufisiente, tanba nee mak ministeriu publiku nia promosaun sira nee la prense rekejitus neebe maka iha nia promosaun rasik, ho nunee iha medida koasaun ida nee aplika aprezentasaun periodika ba arguidu RM, atu aprezenta an fulan ida dala ida, dehan Cansio.

Nia hatutan, iha alegasaun ministeriu publiku husu atu aplika prizaun preventiva ba iha arguidu, maibe krime lima neebe akuza ba arguidu, nunka iha krime ida neebe iha indisus forte atu akuza ba arguidu, ho nunee tribunal no defeza nia analiza, krime neebe ministeriu publiku promove iha primera interogatoriu ida nee, la prense rekejitus husi kirme nee rasik, no la iha indisus sufisiente ka prova ruma konaba pratika husi arguidu sira.

Tanba nee, despaisu neebe sai sei iha loron sanulu resin lima, atu husi parte ministeriu publiku nian bele halo rekursu. No konaba objeitu sira neebe la pertense ba iha objeitu do krime, devolve fila hotu, tanba objeitu husi arguidu nian nee fora husi objeitu do krime, tanba nia seidauk sai DJ mos iha tiha ona.

Defeza nee dehan, krime neebe ministeriu publiku promove mai iha tribunal iha lima, krime falsifikasaun notasaun tekinika, krime falsifikasaun agravadu, krime abuju de poder, kirme korupsaun pasiva no krime danu agravadu.

Nunee depaisu nee hanesan medida neebe aplika deit ba iha arguidu sira, maibe investigasaun kontinua lao no prosesu nee seidauk hotu.

Iha fatin hanesan, tuir defeza arguidu JTS Fernado Da Costa dehan, nia kliente hetan TIR, no ida nee hanesan medida ida, no prosesu nee kontinua lao.

“Hau nia kliente mak xefi suku, hanesan ita boot sira hatene ohin iha nee, iha sira nain sanulu iha sira nain haat mak hetan aprezentasaun periodika fulan ida dala ida, no restu husi nee kontinua aplika TIR inklui hau nia kliente hotu, dehan nia.

Hatan konaba defeza aseita ho despaisu tribunal nee ka lae, nia esplika konserteja nia parte simu, tanba ida nee laos determinante de prosesu, maibe se iha prosesu kontinuasau. No medida TIR nee la prejudika nia kliente, tanba sira iha uma deit hodi hein kontinuasaun de prosesu.

Prosesu primera interogatoriu nee prezide husi juiz titular Ivan Suritai, Ministeriu Publiku reprezenta husi prokurador Matias, no arguidu sira hetan asistensia legal husi Defensor Publiku no Advogado Privado.

Tuir observasaun STL nian iha TDD katak, familia husi arguidu sira nian ba iha tribunal barak, tanba nee polisia BOP, apoiu seguransa too despaisu husi tribunal remata.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here