Investiga Membru F-FDTL Tiru Komunidade Nia Karau

Diretor Ezekutivu Fundasaun Mahein, João Almeida. (Foto: STL/Efizenia da Costa)

DILI, STLNEWS.co – Fundasaun Mahein (FM), husu ba Ministru Defeza, atu investiga membru F-FDTL, neebe deskonfia utiliza armas hodi tiru mate komunidade ninia karau iha Bobonaro.

Kestaun nee Diretor Ezekutivu Fundasaun Mahein, João Almeida, hatan relasiona ho preokupasaun sira neebe maka hatoo husi komunidade sira, liu husi midia sosial, liu-liu Facebook.

“F-FDTL utiliza sala armas hodi tiru komunidade sira nia karau, ita haree iha kazu neebe foin dadauk akontese, tiru komunidade nia karau iha neeba, hanoin katak kazu ida nee seriu, komandu F-FDTL tenki foti medidas sira neebe nesesariu bazeia regulamentu disiplinar ba militar (RDM),” dehan nia ba jornalista sira, iha nia knaar fatin Bairo Formoza, Dili, Kinta (18/02/2021).

Nia dehan, karik iha prosesu investigasaun identifika iha indisiu sira krime nian, entaun presiza loke prosesu kriminal komportementu membru F-FDTL neebe involve iha kazu refere.

“Hau hanoin katak, tenki loke prossesu kriminal hasoru komportamentu sira hanesan nee, tanba kazu tiru komunidade nia karau laos foin akontese, miabe fulan kotuk iha Manufahi mos akontese ona,” dehan nia.

Nia hatete, ema hotu hotu hatene katak iha Timor intituisuan 3 deit, maka kaer kilat, hanesan F-FDTL, PNTL, no PSIK. Entaun komportamentu no hahalok sira hanesan nee tenki evita no aplika regras disiplina sira neebe instituisaun iha.

“Kazu hanesan iha Maliana, identifika katak oknum membru F-FDTL balun komete asaun ida nee, komandu tenki loke prosesu disiplinar kuandu iha investigasuan,” nia haktuir.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here