Jestor Prinsipal Telemor ho Elite Computer; Hetan Medida Prizaun Preventiva

Tribunal Distrital Dili iha loron Sabado, liu husi despaisu ikus, aplika medida prizaun preventiva, ba iha arguidu nain rua nudar Diretor Jeral Kompana CEO Telekomunikasaun Telemor ho inisial TVB, no Diretor Kompana Elite Computer ho inisial DP. (Foto: STL/Terezinha de Deus)

DILI, STLNEWS.co – Tribunal Distrital Dili iha loron Sabado, liu husi despaisu ikus, aplika medida prizaun preventiva, ba iha arguidu nain rua nudar Diretor Jeral Kompana CEO Telekomunikasaun Telemor ho inisial TVB, no Diretor Kompana Elite Computer ho inisial DP.

Despaisu ikus neebe halao husi juiz titular nee, mais ou menus iha oras tuku 16:00 loraik, iha Tribunal Distrital Dili.

No despaisu nee tun, arguidu nain rua evakua kedan ba iha prizaun Bekora.

Prosesu primera interogatoriu nee, taka ba iha publiku, maibe husi parte MP nian promove arguidu nain rua ba krime burla informatika neebe previstu no punidu iha artigu 268 no krime fraude fiskal neebe previstu iha artigu 314 kodigu penal Timor Leste.

Arguidu nain rua nee, Polisia Nasional Timor-Leste liu husi Servisu Investigasaun Kriminal (SIK) detein arguidu TVB iha ninia servisu fatin Timor Plaza CBD 4 andar tolu, no arguidu DP detein iha ninia servisu fatin Colmera, Dili, iha loron 23/11/2020 no kumpre ona detensaun oras 72, hafoin submete mai iha Tribunal Distrital Dili, mais ou menus iha oras tuku 11:00, iha loron Kinta nee.

Arguidu nain rua hetan detensaun, tanba deskonfia arguidu sira halo korelasaun servisu ba malu hodi fasilita utiliza internet ilegal, neebe uza satelite Indonezia nian ho kapasidade 600mbps (mega byte per second) hodi fasilita ba lina ministeriu sira inklui Komandu Polisia Nasional Timor-Leste.

Nunee, kazu nee Servisu Investigasaun Kriminal deteta hahu kedas hosi tinan 2012 mai too tinan 2018, tamba fo prezuiju ba estadu Timor-Leste lakon osan barak.

Kazu neebe hahu iha oras tuku 11:00 nee, kontinua too kalan, depois tribunal adia hikas hodi rona despaisu ikus.

Nunee Tribunal adia fila fali prosesu nee ba loron Sesta iha tuku 3:00 lokraik, hodi kontinua ba despaisu ikus.

Hafoin sai husi sala julgamentu mai, defeza arguidu sira nian, hateten katak despaisu ikus adia ba loron Sesta, iha tuku tolu loraik.

“Desizaun adia ba aban tuku 3:00 hodi rona desizaun” dehan Advogadu Privadu Pedro Apariçio, ba jornalista sira hafoin sai husi julgamentu laran kalan nee.

Prosesu primera interogatoriu nee, prezide hosi Juiza Ercila da Silva, Ministeriu Publiku reprezenta hosi prokurador Matias Soares no prokuradora Lidia Soares, arguidu sira hetan asistensia legal hosi advogadu privadu Pedro Aparicio, Ligia Araujo, no advogadu internasional Duate Carneiro.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here