Julga Oan ho Besi-Kanu

(Foto: Tribunal Distrital de Dili)

DILI, STLNEWS.co — Tribunal Distrital Dili halao julgamentu ba arguidu ho inisial MC, neebe halo agresaun fiziku ba nia oan feto ho inisial MN no FX hanesan fen.

Antes atu tama iha julgamentu tribunal homologa tiha krime ameasa, tanba lezada FX hanesan fen hakarak dada fila, tanba nee tribunal kontinua deit ho krime violensia ho forma ofensa ba lezada MN hanesan arguidu nia oan feto.

Tuir faktus katak, lezada MN hanesan arguidu nia oan feto rasik, no lezada FX hanesan arguidu nia fen, neebe ekonomikamente dependensia ekonomia ba arguidu.

Iha loron 30 Fulan Janeiru 2018, arguidu hetan ona kondenasaun husi tribunal ba kazu ida ho nia pena prizaun fulan neen, suspende ba fulan tolu. Iha loron 31 fulan Julhu 2019, arguidu mos hetan ona kondenasaun husi tribunal liu husi juiz kolektivu ba pena prizaun tinan rua suspende ba tinan haat. Maibe agora dadaun lezada ho nia inan la hela ona ho arguidu.

Iha loron 20 Agustu 2019, iha arguidu nia uma Bekora, lezada foin fila husi konsertu. Too iha uma arguidu husu ba lezada MN katak, momentu lezada nia inan ba iha uma foti saida, lezada MN hatan foti napiron.

Rona lezada hatan nunee arguidu lori kedan liman tuku iha lezada MN nia hirus matan, hafoin lezada halai tiha tama ba uma laran, maibe arguidu foti besi kanu ida hodi tuir lezada, no baku iha lezada nia ulun, maibe lezada lori liman satan netik no besi nia tutun, kona iha lezada nia liman karuk hodi rezulta kanek, nakles no ran sai barak, no lezada halai sai tiha ba liur. Maibe arguidu sei duni lezada lori besi kanu, baku tan iha lezada nia kanosan parte karuk, no arguidu duni lezada sai husi uma, iha kalan nee kedan lezada sai husi uma hela ho nia bin sarani sira durante fulan ida.

Konsekuensia husi arguidu nia hahalok nee, halo lezada sente moras maibe la ba halo tratamentu.

Iha loron 10 fulan Agustu 2019 arguidu iha hela Same maka telefone ba lezada FX neebe hanesan nia fen, hodi ameasa nia tanba mai iha uma foti napiron.

Iha loron 26 fulan Agustu 2019, lezada FX hanesan arguidu nia fen ba estor osan iha nia kolega iha Bekora, nia kolega mos konta katak arguidu sempre ba buka lezada, tanba nee lezada tauk no ba liu uma Mahon.

Relasiona nee MP akuza arguidu ba krime violensia domestika ho forma ofensa ba integridade fizika simples neebe previstu iha artigu 145 husi KP hasoru lezada MN hanesan arguidu nia oan.

Krime ameasa previstu iha artigu 157 iha KP hasoru arguidu nia fen lezada FX. Hatan ba faktus nee, arguidu deklara loos hotu. “Hau deklara faktus neebe iha loos hotu kedan, hau la nega no hau koalia sai husi hau nia laran,” deklara arguidu iha sala julgamentu TDD, 02/10/2020.

Arguidu mos arepende ba nia hahalok, no promete sei la halo tan iha futuru, maske antes nee nia halo bebeik ona no agresaun ba nia oan no fen.

Iha sala julgamentu lezada mos reforsa tan katak, arguidu lori duni besi kanu baku lezada. “Apa lori duni besi kanu baku hau,” deklara lezada ho mata ben. Lezada deklara tan katak, agora lezada ho nia inan la hela hamutuk ona ho arguidu, tanba arguidu hola ona feto kiik.

Rona tiha husi parte rua, tribunal husu ba iha MP atu tama ba iha alegasaun.
Liu husi alegasaun MP mantein ho nia akuzasaun neebe iha, no husu tribunal tetu ho kondenasaun sira neebe antes nee, atu halo revogasaun ba pena.

Enkuantu husi parte defeza nian, husu ba tribunal atu aplika pena neebe adekuadu ba arguidu, tetu mos ho sirkunstansia neebe iha.

Rona tiha alegasaun, tribunal deside adia hikas julgamentu ba loron 19 Outubru hodi rona desizaun ikus.

Audensia julgamentu nee prezidi husi Juiz Singular Ersilia da Silva, MP reprezenta husi prokuradir Nelson, arguidu hetan asistensia legal husi Defensor Publiku Marsal Mascarinhas.

Reportajen: Terezinha de Deus
Editora: Ekipa STL

LEAVE A REPLY

Please enter your comment!
Please enter your name here