Juventude Ataka Malu Rezulta Balu Kanek-Uma No Sasan Barak Estragus

Juventude Wedauberek-Wesusu Munisipiu Manufahi Alas ataka malu, rezulta ema nain 5 kanek, joven nain 4 no katuas ida kanek inklui uma sasan komunidade hetan estragus hanesan sunu no harahun. (Foto: STL/Guilhermina Franco)

ALAS, STLNEWS.co – Juventude Wedauberek-Wesusu Munisipiu Manufahi Alas ataka malu, rezulta ema nain 5 kanek, joven nain 4 no katuas ida kanek inklui uma sasan komunidade hetan estragus hanesan sunu no harahun.

Situasaun nee akontese horkalan madrugada too ohin Sesta (1/1/2021), halo joven barak kanek komunidade uma sasan balu hetan sunu. Maske nunee maibe hetan antisipasaun ona husi seguransa PNTL no F-FDTL.

Iha intervista Xefi Suku Uma-Berloik, Bernado Fernandes Flores, hatete, situasaun nee mos, agora dadaun ema hotu hatene katak, iha suku nee horkalan tuur hamutuk too tuku ida kalan fahe malu tanba polisia sira mos fo sai informasaun katak labele halibur malu, tanba nee husi tuur hamutuk nee despede tiha tinan tuan no simu tinan foun fahe malu hotu. Maibe too tuku 3 madrugada nia parte lahatene husi grupu ida mai hodi sadik komunidade sira, ikus mosu problema.

“Nunee situasaun nee lao mai too ohin dadersan grupu sira kontinua ataka ikus akontese situasaun manas. Husi akontesementu nee, husi parte Uma-Berloik nian ema ida sai vitima kanek no uma, motor hetan ida sunu, balu estragus, nunee mos uma barak sobu ka estragus”, konta Bernado ba STL iha fatin akontesementu Suku Uma-Berloik.

Nia informa, motor neebe sunu ida, balu aat, kona ba uma seidauk identifika numeru lo-loos estragus tanba situasaun sei lao namanas hela.

Foto: STL/Guilhermina Franco

Xefi suku nee husu ba komunidade sira, liu-liu ba juventude sira atu kalma lai hodi hein prosesu lao ba oin, tanba haree ba kazu nee boot oituan.

Enkuantu kona ba seguransa nia nuudar suku nafatin kolabora ho seguransa atu nunee halo antisipasaun ba situasaun nee.

Iha parte seluk Xefi Suku Mahaquidan Cristovão Fereira Sanches, hatete, tuir informasaun jeral neebe nia hetan husi komunidade balu katak akontesementu nee inisiu husi provoka malu liu husi gas motor, depois abuza malu ikus konsege mosu dezentendimentu ida nee. “Neebe tuir informasaun katak ita nia joven sira husi Mahaquidan nain 4 mak hetan hetan kanek ka pankada makas, nee informasaun neebe nia parte hetan.” Dehan nia.

Nia dehan, tuir informasaun katak situasaun nee akontese madrugada, ikus mai loron sira hahu ataka malu mak situasaun nee sai nunee.

Tuir Xefi suku nee katak, parte autoridade sei nafatin kolabora ho parte seguransa atu nunee kria estabilidade.

Foto: STL/Guilhermina Franco

Entretantu situasaun nee jornalista STL koko konfirma ho parte seguransa, maibe seidauk bele responde tanba sei atua namanas hela ba situasaun refere.

Entretantu observasaun jornalsita STL haree katak, situasaun ba ataka malu nee manas, tanba nee rezulta joven nain 4 no katuas ida hetan kanek no harahun uma komunidade no motor inklui balu hetan sunu.

Situasaun oras nee hetan atuasaun hela seguransa PNTL no F-FDTL.*

Reportajen: Guilhermina Franco
Editor: Ekipa STL

LEAVE A REPLY

Please enter your comment!
Please enter your name here