Kazu Asidente-Insidente Hamutuk 55

Husi loron 11 too 17 Novembru Komandu Jeral (KOMJER), Polisia Nasional Timor-Leste (PNTL), rezistu kazu asidente ho insidente hamutuk 55 neebe akontese iha rai laran. (Foto Ilustrasaun: GSE)

DILI, STLNEWS.co – Husi loron 11 too 17 Novembru Komandu Jeral (KOMJER), Polisia Nasional Timor-Leste (PNTL), rezistu kazu asidente ho insidente hamutuk 55 neebe akontese iha rai laran.

Porta voz Komandu Jeral PNTL Superintendente Xefe Arnaldo de Araujo informa, kazu asidente 12 no insidente 43 neebe akontese iha munisipiu 12 inklui RAEOA hamutuk 55.

“Durante semana ida Komandu Jeral PNTL rejistu kazu asidente hamutuk 12, kompostu husi, motor ho motor soke malu 5, kareta ho motor soke malu hamutuk 4 no seluk tan neebe rezulta ema kanek maibe ema mate la iha,” dehan Porta Voz KOMJER PNTL Arnaldo liu husi komferensia imprensa, neebe halao iha Komandu Jeral Caicoli, Dili, Tersa(17/11/2020).

Nia dehan, iha semana ida nee mosu mos insidente iha rai laran hahu loron 11 too 17 Novembru, Komandu Jeral PNTL rejistu kazu insidente hamutuk 43.

“Insidente sira nee Dominante liu mak violensia domestika 10, asaltu malu 8, tuda malu 7, sira nee mak aas liu iha semana ida nee sira seluk kazu baibain” dehan nia.

Porta Voz nee informa, PNTL iha rai laran halao hela seguransa no mos halo pasa ravista ba motorizada no kareta inklui mos sasan, tanba la kleur tan Timor-Leste tama ona komemorasaun loron independensia 28 Novembru.

“Polisia sira fo seguransa makaas tebes ba fatin hotu-hotu, tanba nee husu ba komunidade sira bainhira lao karik la bele haluha lori dokumentu motorizada no kareta nian inklui mos karta kondusaun nunee la bele inpaktu bainhira sira lao iha dalan, tanba dadaun nee PNTL munisipiu hotu halo hela pasa ravista,” Arnaldo hakotu.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here